Laugardaginn 1. október verður hin árlega Sauðamessa haldin í Borgarnesi. Þetta er í þrettánda sinn sem hátíðin er haldin og að vanda verður dagskráin með fjölbreyttu sniði, en þó með einhverjum breytingum frá fyrri árum. Hlédís Sveinsdóttir og Rúnar Gíslason sjá um skipulagningu Sauðamessunnar í ár, líkt og undanfarin ár. „Við byrjum reyndar á föstudeginum í ár og verðum með einn viðburð á föstudagskvöldinu. Við ætlum að sýna myndina Yarn í Hjálmakletti klukkan 20. Við töldum hana eiga gríðarlega vel við, í henni er garninu gert hátt undir höfði og stefnum á að hafa samprjón á meðan á myndinni stendur,“ segir Hlédís. Hefðbundin dagskrá Sauðamessu hefst síðan í Skallagrímsgarði á laugardeginum klukkan 14. „Það verður ánægja að fara aftur þangað eftir tveggja ára hlé. Þar verður þessi hefðbundna hátíðardagskrá á sviði. Séra Elínborg Sturludóttir ætlar að setja hátíðina og messa. Raftar gefa kjötsúpu, markaðurinn verður á sínum stað og þessir föstu liðir,“ segir Hlédís. Hún nefnir að lambalærakappátið, sem alltaf slær í gegn, verði á sínum stað ásamt sveitakeppni og í henni verði meðal annars sparðatíningur og keppakapp. „Svo verða tuddi og tælenskur í garðinum. Við erum ótrúlega kát með að vera að koma aftur í Skallagrímsgarð og erum Röftunum mjög þakklát fyrir kjötsúpuna,“ heldur hún áfram. Hinir sívinsælu Villi og Sveppi munu halda uppi stuðinu í Skallagrímsgarði á Sauðamessunni í ár. Flottasta lopapeysan verður valin og frumlegasta lopaflíkin einnig.

„Amma, dönsum við þetta lag!“

Sauðamessunni lýkur með hinu árlega Sauðamessuballi í Hjálmakletti, þar sem hljómsveitin Bland mun leika fyrir dansi. „Við verðum með stórdansleik í Hjálmakletti. Ballið er alltaf skemmtilegt og er fyrir mjög breitt aldursbil. Uppáhaldssetningin mín sem ég hef heyrt á Sauðamessuballi er: „Amma, dönsum við þetta lag!“ Þar sást best hversu blandaður hópur er á ballinu, þarna voru einhverjar þrjár kynslóðir að skemmta sér saman,“ segir Hlédís. Hún segir einnig hafa heyrt aðra skemmtilega setningu á barnum þegar einn maður ætlaði að panta sér drykk sem ekki var til. Þá heyrðist: „Æ, láttu mig þá hafa lifrarpylsu og mjólkurglas.“ Þetta er stemningin sem er á ballinu. Það er boðið upp á sviðasultu, slátur og lifrarpylsu á barnum og það eru allir sáttir og afslappaðir. Það er aldrei neitt vesen á þessu balli,“ segir Hlédís að endingu.

Sauðamessa framundan í Borgarnesi