Sláturhús Vesturlands verður opnað í Stóru-Brákarey í Borgarnesi í byrjun næsta mánaðar. Það er félag í eigu Guðjóns Kristjánssonar og bræðranna Jóns, Kristins og Snorra Þorbergssonar sem stendur að opnun sláturhússins í húsnæði félagsins. Þar verður hægt að slátra 350 lömbum, 125 svínum eða 35 stórgripum á dag.

Fyrstu gripunum verður slátrað í tilraunaslátrun föstudaginn 30. september næstkomandi undir eftirliti fulltrúa Matvælastofnunar. Mánudaginn 3. október munu síðan eftirlitsmenn frá Matís koma og taka starfsemina út. Að því loknu verður formlega hægt að hefja slátrun í Sláturhúsinu í Borgarnesi.

Á ýmsu hefur gengið í aðdraganda opnunar sláturhússins. Upphaflega strandaði hún á skipulagsmálum fyrir nokkrum árum síðan og hefur það tafið ferlið einna mest. Málið hefur verið lengi í kerfinu og fyrst nú sem allt er að verða klappað og klárt og styttist í að hægt verði að taka sláturhúsið í gagnið til frambúðar. „Ég held þetta sé í þriðja skiptið sem við reynum að opna,“ segir Guðjón Kristjánsson sláturhússtjóri. Hann kveðst hins vegar hæstánægður að ferlinu sé loks að ljúka, horfir björtum augum til framtíðar og segir viðtökurnar framar sínum björtustu vonum. „Það sem af er eru undirtektirnar mjög góðar og pantanir eru mjög góðar, sérstaklega í ljósi þess að við komumst ekki af stað fyrr en sauðfjárbændur eru flestir byrjaðir að slátra og búnir að gera ráðstafanir með að senda fé sitt annað,“ segir sláturhússtjórinn. „Það er framorðið á sláturtíð og því ekki við öðru að búast og við höfum að sjálfsögðu fullan skilning á því að bændur séu búnir að panta slátrun annars staðar, það er mjög eðlilegt,“ segir hann og bætir því við að af þeim sökum verði ekki afurðastöð í Borgarnesi fyrst um sinn. „Fyrst um sinn munum við mest slátra fyrir heimtöku og slátra og afhenda fyrir þá sem selja kjöt beint frá býli. Við ætlum að sinna því eins vel og við getum, síðan vitum við ekki hvað gerist í framtíðinni,“ segir hann og bætir því við að mest um vert sé að koma starfseminni af stað. „Við erum búnir að vera þolinmóðir í fjögur ár og ætlum ekki að sigra heiminn á fyrsta degi. Við ætlum að vinna þetta í góðu samstarfi og samvinnu við bændur, því við erum ekkert án bændanna,“ segir Guðjón.

Sláturhús Vesturlands verður opnað í Borgarnesi í byrjun október