Víkingsliðin tvö mættust í Ólafsvík í gær þegar heimamenn í Víkingi Ó. tók á móti Víkingi R. í 19. umferð Pepsi deildar karla í knattspyrnu. Leiknum lauk með 1-1 jafntefli og náðu Ólafsvíkingar í mikilvægt stig í fallbaráttunni. Var það aðeins annað stigið sem þeir ná að krækja í á síðari hluta mótsins.

Mikið rigndi í Ólafsvík í gærdag og þurfti að drena völlinn fyrir leik. Hann var hins vegar fljótt aftur mjög blautur. En leikurinn hófst fjörlega því heimamenn komust yfir strax á 3. mínútu. Boltinn barst á Egil Jónsson sem gaf fallega sendingu inn í vítateiginn á Þorstein Má Ragnarsson sem skallaði boltann fyrir markið að nýju. Þar var mættur Kenan Turudija sem klippti boltann á lofti, beint í hliðarnetið og kom heimamönnum yfir.

Víkingur Ó. var heldur sterkara lið vallarins eftir markið. Þeir léku vel saman við erfiðar aðstæður en veðrið var þeim líka erfitt á köflum. Til að mynda var Pape Mamadou Faye við það að sleppa í gegn eftir frábæra sendingu frá Hrvoje Tokic þegar boltinn stoppaði í polli sem myndast hafði á vellinum.

Gestirnir sóttu í sig veðrið eftir því sem leið á hálfleikinn og jöfnuðu á 29. mínútu. Ívar Örn Jónsson átti fast skot að marki úr vítateignum sem Christian Liberato náði að verja. Hann náði hins vegar ekki að halda boltanum og Alex Freyr Vilhjálmsson hirti frákastið og kom boltanum í netið. Leikurinn var fremur bragðdaufur eftir jöfnunarmark gestanna og fátt markvert gerðist fram að leikhléi.

Nokkuð jafnræði var með liðunum í upphafi fyrri hálfleiks en gestirnir voru þó nálægt því að komast yfir á 50. mínútu. Christian Liberato markvörður hljóp í átt að hliðarlínunni til að hreinsa frá langa sendingu gestanna fram völlinn. Hann hitti boltann hins vegar mjög illa og fór hann beint á mótherja sem var ekkert að tvínóna við hlutina og lét vaða af löngu færi í átt að opnu markinu. Boltinn small hins vegar ofan á þverslána og heimamenn sluppu með skrekkinn.

Ólafsvíkingar tóku hægt og rólega stjórn leiksins í sínar hendur. Þeir voru mun sterkara lið vallarins nánast óslitið það sem eftir lifði leiks en tókst ekki að bæta við marki. Þeir settu allt í sóknina undir lok leiksins og uppskáru dauðafæri sem fór forgörðum sem og langskot sem fór rétt yfir en allt kom fyrir ekki. Fleiri mörk voru ekki skoruð í Ólafsvík og skildu liðin því jöfn með eitt mark hvort.

Víkingur Ó. hefur nú 20 stig í 9. sæti deildarinnar, þremur stigum frá fallsæti. Næst leikur liðið mánudaginn 19. september næstkomandi þegar það heimsækir botnlið Þróttar.

: Það vakti athygli á leik Víkingsliðanna að tveir ungir menn voru með fána merktan Pape Mamadou Faye. Pape sagði í samtali við Skessuhorn eftir leikinn að hann þekkti ekki þessa menn en þeir sögðu honum að þeir hefðu gert sér ferð til Íslands frá Sviss þar sem þeir búa, til þess eins að sjá Pape spila einn leik. „Ég hef bara gaman að þessu sagði Pape skælbrosandi, ég átti nú alls ekki vona á að sjá svona fána uppi með mínu nafni á leiknum. „En þetta er bara kúl,“ sagði Pape og var að vonum ánægður með sína menn. Ljósm. og texti af.

Víkingsliðin skildu jöfn í Ólafsvík í gær