Bæjarstjórn Grundarfjarðar samþykkti á fundi sínum síðastliðinn fimmtudag að samið yrði við Alta ehf. um hönnun og skipulag vegna uppbyggingar ferðamannastaðar við Kolgrafafjörð. Styrkur að verðmæti 2,8 milljónir krónur fékkst til verksins þegar úthlutað var úr Framkvæmdasjóði ferðamannastaða á vordögum.

Þorsteinn Steinsson, bæjarstjóri Grundarfjarðar, segir algengt að ferðamenn og ferðalangar geri töf á ferð sinni í Kolgrafafirði. „Við Kolgrafafjörðinn er mikið dýralíf, þar hafa háhyrningar og selir farið eftir síldinni inn fjörðinn auk þess sem þar er fjölskrúðugt fuglalíf. Ferðamenn hafa stoppað mjög mikið í Kolgrafafirði og hefur það valdið óþægindum í umferðinni og jafnvel skapað hættu,“ segir Þorsteinn í samtali við Skessuhorn. „Hugmyndir okkar gera því ráð fyrir einhvers konar húsum til fugla- og dýraskoðunar með göngustígum og aðgengi að staðnum sitt hvorum megin við brúna sem verði þannig úr garði gert að ferðamenn og aðrir sem vilja skoða náttúrulífið í Kolgrafafirði þurfi ekki að standa á eða fara yfir þjóðveginn,“ segir hann.

Vinna við áningarstað í Kolgrafafirði er að sögn bæjarstjórans þegar hafin. „Við fengum þennan styrk úr Framkvæmdasjóði ferðamannastaða til að hanna og gera hugmyndir að skemmtilegum áningarstað. Hönnunar- og skipulagsvinna er í gangi hjá bænum í samvinnu við þetta fyrirtæki, Vegagerð og landeigendur. Síðan ætlum við í framhaldinu að leita frekari fjármuna til að útfæra hugmyndir um áningarstað í takt við það sem kemur út úr þessari hönnunar- og skipulagsvinnu sem nú stendur yfir,“ segir Þorsteinn. Áætlað er að hugmyndavinnunni verði lokið fyrir áramót og þá verði hægt að ákveða næstu skref. „Tímamörk hönnunarvinnu miðast við að henni ljúki fyrir áramót. Um leið og búið er að hanna hugmyndina þá munum við ganga þannig frá deiliskipulagi fyrir staðinn að hægt verði að ganga í framkvæmdina. Í framhaldinu munum við síðan hugleiða í auknum mæli að leggja göngustíga og gera gönguleiðir við Kolgrafafjörð. Það er mikilvægt að hanna hugmyndina, útfæra og hugsa hvernig hægt er að gera áningarstaðinn þannig að hann verði aðlaðandi og hægt að halda honum í lagi,“ segir Þorsteinn að lokum.

Unnið að hönnun áningarstaðar við Kolgrafafjörð