Mikil reiði er í röðum Pírata í Norðvesturkjördæmi með þá ákvörðun flokksins að láta endurtaka prófkjör til að fá aðra niðurstöðu um röðun lista en fékkst eftir prófkjör félagsmanna í kjördæminu. Skessuhorn hefur undir höndum bréf þar sem þeirri óánægju er lýst og afskipti Birgittu Jónsdóttur fordæmd af málinu. Í aðsendri grein sem birt var hér á vefnum í dag átelur Lilja Magnúsdóttir, fyrrverandi fulltrúi í kjördæmisráði Pírata í Norðvesturkjördæmi, afskipti Birgittu kafteins Pírata, og annarra framámanna í flokknum, af niðurstöðu fyrra prófkjörs flokksins í NV kjördæmi. Eins og kunnugt er var niðurstaðan ógilt og kosið að nýju.

„Þingmaður flokksins, Birgitta Jónsdóttir, fór hamförum á leynilegri síðu flokksins þar sem hún sagðist þekkja mann og annan í heimabæ Þórðar Péturssonar, efsta manns á lista, sem gætu sagt sér hitt og þetta um manninn,“ skrifar Lilja og heldur því fram að Birgitta, Jóhann Kristjánsson, parið Gunnar Ingiberg og Halldóra Sigrún Ásgeirsdóttir, og fleiri hafi beitt sér til að niðurstaða prófkjörs yrði ógilt. „Áróðurinn var gengdarlaus á facebooksíðum flokksins, bæði opinberum og óopinberum. Símtöl héldu áfram að berast um allt land. Fólk var beðið um að fella listann og ýmiskonar rökum slengt fram, efstu menn væru ekki þekktir innan grasrótarinnar í Reykjavík, það væri ekki nógu margar konur á listanum og það þyrfti að rétta við hlut Vestfirðinga. En fyrst og fremst var sú ástæða nefnd að smölun væri ekki liðin innan flokksins. Allavega ekki úr þeirri átt sem talin var hafa verið í baráttu efsta manns á listanum.“

Að endingu óskar Lilja sigurvegurum prófkjörsins til hamingju með árangurinn.

Birgitta beitti sér gegn niðurstöðu prófkjörs