Bókasafnsdagurinn er í dag, fimmtudaginn 8. september. Hann nota söfnin til að kynna starfsemi sína fyrir almenningi. Bókasafn Akraness ætlar í ár að bjóða upp á örkynningu á sjálfsafgreiðsluvélinni sem tekin var í notkun í byrjun ársins. Gestum verður boðið að prófa undir leiðsögn bókavarðar. Einnig verður opnuð sýning Þorvaldar Jónassonar, Svart og hvítt. Sýningin opnar kl. 17.00 og allir eru velkomnir (sjá nánar í frétt í Skessuhorni í dag).

Frá Bókasafni Akraness:

“Fyrir utan þá sem koma og fá lánaðar bækur er fjöldi fólks sem kemur til að kíkja í dagblöðin, notfæra sér frítt netsamband eða aðgang að tölvu sem einnig er í boði. Einnig er vinsælt að nýta Bókasafnið sem biðstöð. Börn koma af æfingum og bíða eftir foreldrum eða öfugt. Þá er notalegt að kíkja í bækur og blöð á meðan. Listsýningar, bókmenntakvöld, fyrirlestrar og jafnvel tónleikar hafa verið fastir liðir í starfi safnsins og áhersla hefur verið lögð á að taka þátt í hinum ýmsu menningarhátíðum bæjarins.

Háskólanemar sem eiga lögheimili á Akranesi eiga kost á því að sækja um aðgangslykil til að nýta sér lestraraðstöðuna í Svövusal utan opnunartíma Bókasafnsins. Um það bil 30 lyklar eru í útleigu en þokkalegt pláss er fyrir 15 – 20 nema í einu. Alltaf er biðlisti eftir lykli og því mikilvægt að þeir sem hafa lykil séu að nota hann reglulega. Í Svövusal er frír aðgangur að neti, snyrting og vatnsvél. Góð fundaraðstaða er í salnum, skjávarpi og möguleiki á fjarfundi.

Samstarf við grunnskóla og leikskóla er mjög mikilvægt og takmarkið er að allir nemendur komi a.m.k. einu sinni á vetri í skipulagðar heimsóknir. Sumarlestur hefur verið vinsælt verkefni í mörg ár. Í ár voru voru tæplega 200 börn sem skráðu sig og um það bil 150 voru virkir lesendur og lásu yfir 1000 bækur.

Bókin heim er þjónusta fyrir eldri borgara og þá sem ekki hafa kost á að koma sjálfir og fá þá bækur sendar heim einu sinni í mánuði. Undir þá þjónustu fellur heimilisfólk á Höfða en alls eru um 20 manns sem nýta sér þessa þjónustu.

Hinir ýmsustu hópar eiga sér afdrep á Bókasafninu. Yfir vetrartíman sér Halldóra Jónsdóttir bæjarbókavörður um bókmenntaklúbb með áhugasömum lesendum. Hópurinn velur sér bækur til að lesa og hittist svo einu sinni í mánuð. Fundir til áramóta verða 22. sept., 20. okt. og 17. nóvember. Allir eru velkomnir í hópinn.

Ljósmyndasafnið hefur nýtt sér aðstöðuna í Svövusal og boðað til morgunfunda hvern miðvikudag frá kl. 10 – 12 yfir vetrartímann. Þessir fundir hafa verið afskaplega vel sóttir og fengu góða kynningu í þættinum Að vestan á N4 í vor. Fyrsti fundur vetrarins verður 21. september.

Prjónahópur hittist alla mánudaga frá kl. 15 – 17. Þar er prjónað af kappi og spjallað um prjónaskap af mikilli kunnáttu. Þessar prjónakonur sýndu prjónuð sjöl á veggjum Bókasafnsins síðast liðið vor.

Dúlluhópurinn, sá er heklaði og setti saman dúlluverk af Akrafjalli í tilefni af 150 ára afmæli Bókasafnsins árið 2014 er enn lifandi og hittist á Bókasafninu 2. og 4. þriðjudag í mánuði kl. 15 – 17. Í þessum hópi er handverk af ýmsum toga, þó mest hekl og/eða prjón. Allir eru velkomnir í þennan hóp.

Á Bókasafninu er gott að vera og við hvetjum hópa sem eru að hittast reglulega að hafa samband, koma í heimsókn og skoða aðstöðuna. Jafnvel væri hægt að skoða að hópar hittust á Bókasafninu á morgnanna.”

Gleðilegan Bókasafnsdag!

Starfsfólk Bókasafns Akraness

Bókasafnsdagurinn og kynning á Bókasafni Akraness í dag