Tónlistarskóli Snæfellsbæjar er með þrjár starfsstöðvar; í Ólafsvík, á Hellissandi og á Lýsuhóli. Kennsla hófst að nýju eftir sumarfrí síðastliðinn mánudag. Alls starfa fjórir kennarar við skólann, að meðtaldri Valentinu Kay skólastjóra. „Starfsemin fer vel af stað í ár. Kennararnir komu allir til vinnu að fullum krafti með margar nýjar hugmyndir fyrir veturinn,“ segir hún. Valentina segir aðsókn í skólann vera með svipuðu sniði og undanfarin ár. Nú séu um 70 nemendur skráðir í skólann, sem er svipaður fjöldi og verið hefur. „Í síðustu viku var innritun og við erum enn að skrá nemendur inn. Við erum alltaf með á bilinu 70 til 80 nemendur og í dag er enginn á biðlista. Það gæti þó breyst eftir eina til tvær vikur.“ Valentina segir góða aðsókn í allt tónlistarnám við skólann en þó sé gítarinn, trommurnar, söngur og píanó það vinsælasta.

Stofnuðu hljómsveit

Að sögn Valentinu er alltaf reynt að koma með nýjar og ferskar hugmyndir þegar skólastarfið hefst á haustin. „Við reynum alltaf að gera eitthvað öðruvísi og bæta nýjungum inn í skólastarfið. Það eru samt fastir liðir hjá okkur sem breytast lítið á milli ára. Við tökum til dæmis alltaf þátt í Nótunni og erum með tónfundi og vorpróf. Í desember erum við með jólatónleika og á vorin eru vortónleikar. Núna erum við með hugmynd um sérstaka tónleika um jólin. Ef það verður að veruleika, gæti það orðið mjög skemmtilegt,“ segir Valentina. Hún segir jólatónleikana hafa heppnast vel á síðasta ári. „Við stofnuðum hljómsveit þar sem yngsta stig, miðstig og eldri krakkarnir spiluðu saman og söngvarar sungu bæði í dúett, tríó og kvartett. Foreldrar voru mjög ánægðir með þessa tónleika.“ Á þessu skólaári er stefnt á áframhaldandi gott starf í skólanum og er reynt að hafa það sem fjölbreyttast. „Við verðum áfram með fasta liði, svo sem tónfundi og munum taka þátt í Nótunni og fara með nemendur í ferðalög og halda tónleika. Við erum í góðu samstarfi bæði við leikskólann og grunnskólann sem hefur verið alveg frábært og við höldum áfram með það.“

Fjölbreytt starf í Tónlistarskóla Snæfellsbæjar