Varðar við lög að stinga af frá ákeyrslu

Hvimleið tjón verða oft á bílastæðum, sérstaklega á stórum bílastæðum við verslanir og fyrirtæki. Theódór Þórðarson yfirlögregluþjónn hjá Lögreglunni á Vesturlandi segir að því miður komi það oft fyrir að stungið sé af frá slíkum málum. „Hægt er að fullyrða að sjaldnast er það svo að viðkomandi ökumaður, sem hlut á að máli, verði ekki var við óhappið eða utaníkeyrsluna en að sjálfsögðu kemur það líka fyrir. Situr þá bíleigandinn eftir með tjónaðan bíl og viðgerðarkostnað sem hann þarf sjálfur að borga. Oft gefa vitni sig fram á vettvangi eða tilkynna atvikin til lögreglu og stundum skilja menn eftir upplýsingar á miða undir rúðuþurrku á tjónaða bílnum með nafni vitnis og jafnvel bílnúmer þess sem keyrir utan í eða veldur tjóninu. Þá gerist það einnig að lögreglan hefur uppi á tjónvaldi vegna sjáanlegrar ákomu á bílnum hans sem passar við tjónið á hinum bílnum hvað varðar lit og staðsetningu. Það varðar að sjálfsögðu við lög að stinga af frá umferðaróhappi og eru menn sektaðir fyrir slíkt ef það sannast,“ segir Theódór.

Líkar þetta

Fleiri fréttir