Féll af mótorhjóli

Aðeins urðu fimm umferðaróhöpp í umdæmi Lögreglunnar á Vesturlandi í liðinni viku og telst það, að sögn Theódórs Þórðarsonar yfirlögregluþjóns, vera vel sloppið miðað við undanfarnar vikur. Ökumaður bifhjóls hlaut minniháttar meiðsli er hann féll af hjóli sínu á Snæfellsnesvegi við Emmuberg á Skógarströnd í gær. Var hann fluttur á sjúkrahús til nánari skoðunar. Hin óhöppin voru öll minniháttar og án meiðsla á fólki. Engir ökumenn voru teknir fyrir ölvunar- eða fíkniefnaakstur í umdæmi Lögreglunnar á Vesturlandi í liðinni viku. Lögregla tók um 50 ökumenn fyrir of hraðan akstur í umferðareftirlitinu í umdæminu og þá voru teknar myndir af 1303 ökumönnum fyrir of hraðan akstur í vikunni sem leið. Þar af voru 216 myndir teknar með hraðamyndavélinni sem staðsett er við Fiskilæk sunnan Hafnarfjalls.

Líkar þetta

Fleiri fréttir