Hafsteinn M. Einarsson frá PwC og Þóra Birna Ásgeirsdóttir mannauðsstjóri Elkem Ísland við afhendingu gullmerkisins jafnlaunaúttektar PwC.

Elkem Ísland hlýtur gullmerki jafnlaunaúttektar PwC

Elkem Ísland hlaut á dögunum gullmerki jafnlaunaúttektar PwC á Íslandi. Samkvæmt jafnréttislögum ber atvinnurekendum að greiða konum og körlum jöfn laun fyrir jafn verðmæt störf og til að standast jafnlaunaúttektina þurfa fyrirtæki að sýna fram á að launamunur kynjanna sé undir 3,6%. Jafnlaunaúttekt PwC byggir á línulegri fjölbreytuaðhvarfsgreiningu. Sá launamunur sem situr eftir þegar tekið hefur verið tillit til áhrifa tiltekinna breyta á laun (óútskýrður launamunur), er skilgreindur sem ígildi kynbundins launamunar.

Í greiningunni var stuðst við eftirtaldar breytur: aldur, starfsaldur, menntun, starfshóp, stöðu gagnvart jafningjum og stöðu í skipuriti. Þá var einnig tekið tillit til áhrifa heildarvinnustunda þegar gerð var sambærileg greining á heildarlaunum. Niðurstaða PwC leiddi í ljós að launamunur kynjanna reyndist 0,1% í grunnlaunum og 0,6% í heildarlaunum hjá Elkem Ísland, sem þykir mjög góður árangur. „Við erum einstaklega stolt af gullmerkinu, því það styður við þau gildi sem við störfum samkvæmt um að koma fram af virðingu, stuðla að liðsheild og stunda fagleg vinnubrögð,“ segir Þóra Birna Ásgeirsdóttir mannauðsstjóri Elkem Ísland.

Líkar þetta

Fleiri fréttir