Ólína Kjerúlf Þorvarðardóttir, alþingismaður Samfylkingarinnar í NV kjördæmi.

Ólína býður sig fram í forystusæti Samfylkingarinnar

„Fólkið fyrst – eitt samfélag fyrir alla,“ eru baráttuorð Ólínu Kjerúlf Þorvarðardóttur alþingismanns Samfylkingarinnar í Norðvesturkjördæmi, sem nú hefur ákveðið að gefa kost á sér í fyrsta sæti á lista flokksins fyrir þingkosningarnar 29. október næstkomandi. „Ég hef afráðið að gefa áfram kost á mér til þess að leiða Samfylkinguna í Norðvesturkjördæmi í næstu kosningum. Sem alþingismaður hef ég þjónað Norðvesturkjördæmi í fimm ár. Ég var fyrst kjörin á þing 2009 – 2013 en tók aftur þingsæti síðastliðið haust við fráfall Guðbjartar Hannessonar fyrrverandi velferðarráðherra. Þau mál sem brenna á byggðum landsins þekki ég af eigin raun og vil því beita mér fyrir bættum lífskjörum og afkomu íbúa landsbyggðarinnar,“ segir Ólína. Hún kveðst í samtali við Skessuhorn ætla að verja þingsæti sitt í flokksvalinu sem fram fer í næsta mánuði.

„Ég er jafnaðarmaður að hugsjón, set fólk í fyrirrúm og brenn fyrir jöfnuð, réttlæti og sanngjarnar leikreglur í samfélagi okkar. Mín helstu baráttumál hafa verið breytingar á fiskveiðistjórnunarkerfinu, bættar samgöngur og velferðarmál. Ég vil að Ísland sé eitt samfélag fyrir alla þar sem hver maður fær að gefa eftir getu og þiggja eftir þörfum og þar sem gott og gjaldfrjálst heilbrigðiskerfi, sterkt menntakerfi og traust og skilvirt almannatryggingakerfi eru við lýði. Ég vil að byrðum sé dreift á herðar þeirra sem geta borið þær; að enginn maður þurfi að óttast afkomu sína vegna örorku, aldurs eða fötlunar; að þjóðarauðlindir séu nýttar í þágu samfélagsins og öflugra atvinnugreina; að mannréttindi og atvinnufrelsi séu ófrávíkjanleg krafa og að markaðurinn sé þjónn en ekki herra – heilbrigt samkeppnisumhverfi ríki í öllum atvinnugreinum.“

Ólína segir að Alþingi Íslendinga sé mikilvægasta lýðræðisstofnun samfélags okkar. „Virðing Alþingis veltur á framgöngu þeirra sem þar starfa. Ég vil leggja mitt af mörkum til þess að bæta stjórnmálamenningu og umræðuhefð á Íslandi. Nú er brýnna en nokkru sinni að snúa við þeirri óheillaþróun sem orðið hefur í tíð núverandi ríkisstjórnar. Velferðarkerfið er í miklum vanda og engin menntastefna sjáanleg. Hægt og bítandi er verið að ýta fólki inn í einkarekin heilbrigðis- og menntakerfi með því að fjársvelta svo hið opinbera kerfi að það rís ekki undir hlutverki sínu. Mikið verk er óunnið í samgöngumálum, byggðamálum, auðlinda- og atvinnumálum, málefnum skuldara, öryrkja, aldraðra og barnafólks. Ég heiti því að vinna af heilindum og festu að úrbótum og framförum í samfélagi okkar, hér eftir sem hingað til,“ segir Ólína Kjerúlf Þorvarðardóttir, alþingismaður.

Líkar þetta

Fleiri fréttir

Gleðilegt sumar!

Skessuhorn óskar lesendum sínum, ungum sem gömlum, til sjávar og sveita, gleðilegs sumars.