Þorlákshöfn.

Árétta mikilvægi forkaupsréttar sveitarfélaga að aflaheimildum

Á fundi stjórnar Samtaka sjávarútvegssveitarfélaga sem haldinn var 4. ágúst síðastliðinn var rætt um forkaupsrétt sveitarfélaga á aflaheimildum og sölu aflaheimilda frá Þorlákshöfn. Eftirfarandi bókun var samþykkt samhljóða: „Stjórn samtaka sjávarútvegssveitarfélaga leggur áherslu á að sveitarfélög hafi skýran forkaupsrétt þegar skip með aflaheimildum, aflaheimildir, eða hlutir í lögaðila sem á skip með aflaheimildum eru seld til aðila með heimilisfesti í öðru sveitarfélagi. Ljóst er að núgildandi lagaákvæði veita sveitarfélögum litla vörn þegar aflaheimildir eru seldar úr viðkomandi sveitarfélagi.“

Þá segir að í ljósi fregna um að um 28% aflaheimilda hafi verið seldar úr sveitarfélaginu Ölfusi, án þess að sveitarfélaginu hafi verið boðinn forkaupsréttur, skorar stjórn samtakanna á sjávarútvegsráðherra og Alþingi að breyta ákvæðum laga um stjórn fiskveiða hið fyrsta og tryggja sveitarfélögum raunverulegan forkaupsrétt. „Stjórn vill auk þess benda á það sjónarmið að forkaupsréttur hljóti að vera neyðarúrræði þegar miklir samfélags- og atvinnuhagsmunir eru í húfi, og megi ekki draga um of úr sóknarmöguleikum útgerða og byggðarlaga sem vilja sækja aflaheimildir og byggja upp útgerð á tilteknum stað. Slíkt myndi festa núverandi staðsetningu aflaheimilda í sessi. Byggðarlög með útgerð í vexti, þurfa að hafa möguleika til vaxtar.“

Þá vekur stjórn samtakanna athygli á hugmyndum Byggðastofnunar um að svæðisbinda hluta aflaheimilda og með þeim hætti verja hagsmuni sjávarbyggða. „Stjórnin harmar jafnframt þá skerðingu á byggðakvóta fyrir komandi fiskveiðiár sem boðuð hefur verið og telur að hún komi harðast niður hjá þeim sveitarfélögum sem nú þegar eiga undir högg að sækja.“

Líkar þetta

Fleiri fréttir