Föstudaginn 15. júlí var ár liðið frá opnun Hótel Húsafells. Reksturinn hefur gengið vel þennan tíma og oft verið fullbókað á hótelinu. Á afmælisdaginn voru vaskir iðnaðarmenn að leggja lokahönd á 12 herbergja stækkun við hótelið. „Þeir hafa unnið enn eitt kraftaverkið og lokið góðu verki,“ segir Bergþór Kristleifsson framkvæmdastjóri í samtali við Skessuhorn. „Vinna við stækkunina hófst eftir páska og hefur gengið hratt og vel fyrir sig. Veðrið lék við okkur á byggingartímanum, en til gamans má geta þess að þann tíma sem fyrri áfanginn var í smíðum, komu 27 sinnum slæm veður sem sum hver töfðu vinnuna. Ég vil færa þeim mínar bestur þakkir og segi einfaldlega takk til þessara rösku iðnaðarmanna sem hér hafa lokið verki: Eiríkur, Kiddi og allir ykkar menn, Arnar rafvirki, Dóri pípari, Finnbogi málari, Sindri garðyrkjumeistari, Meistaramúr, Unnsteinn hleðslumaður, Steini og Palli Guðmunds og allir hinir. Takk fyrir fullskapað Hótel Húsafell,“ segir Bergþór.

: Vaskur hópur iðnaðarmanna sem var staddur á svæðinu á árs afmælisdegi hótelsins þegar unnið var við lokafrágang á viðbyggingunni.

Fréttin birtist fyrst í Skessuhorni miðvikudaginn 20. júlí síðastliðinn.

Stækkun Hótel Húsafells er lokið