Sjö ólík umferðaróhöpp en öll án meiðsla á fólki

Í liðinni viku urðu sjö umferðaróhöpp í umdæmi lögreglunnar á Vesturlandi, öll blessunarlega án teljandi meiðsla á fólki. Árekstur varð niður undir Akranesi milli sendibíls og sjúkrabíls, enginn sjúklingur var í sjúkrabílnum. Áreksturinn atvikaðist þannig að ökumaður sjúkrabílsins var að beygja út fyrir kyrrstæðan gámabíl þegar bíll kom úr gagnstæðri átt. Ökutækin voru bæði óökuhæf eftir áreksturinn.

Erlendur ökumaður reyndi ótímabæran framúrakstur í Leirársveitinni í vikunni og þegar bíll kom á móti honum, þar sem hann var á öfugum vegarhelmingi, þá beygði hann í skyndi útaf og endaði úti í grænum móa án þess að velta. Bílaleigubíllinn var hins vegar óökufær eftir loftköstin utan vegarins.

Erlendir ökumenn voru í akstri á Snæfellsnesi á tveimur bílum. Þegar ökumaður fremri bílsins uppgötvaði að hann var á rangri leið þá hægði hann ferðina og beygði síðan til vinstri og ætlaði út á næsta afleggjara til að snúa við. Þegar ökumaður aftari bílsins sá þann fyrir framan hægja ferðina datt honum í hug að fara framúr honum og þannig varð nokkuð harður árekstur þessara ökutækja sem að skemmdust töluvert. Annar bíllinn var óökufær en hinn var ökufær eftir lagfæringar á staðnum.

Einn ökumaður var tekinn fyrir ölvun við akstur í umdæmi Lögreglunnar á Vesturlandi í vikunni. Þá tóku lögreglumenn um 40 ökumenn fyrir of hraðan akstur víðs vegar í umdæminu og hraðamyndavélarnar mynduðu 645 ökumenn fyrir of hraðan akstur, þar af um 160 við Fiskilæk sunnan Hafnarfjalls.

Líkar þetta

Fleiri fréttir