Helga Gunnarsdóttir hefur látið af störfum sem sviðsstjóri skóla- og frístundasvið Akraneskaupstaðar. Á fundi skóla- og frístundaráðs þann 12. júlí sl. voru Helgu þökkuð mjög góð störf í þágu skóla- og frístundastarfsemi á Akranesi og óskað velfarnaðar í framtíðinni. Á sama fundi voru samþykkt drög að hæfniskröfum og auglýsingu vegna ráðningar nýs sviðsstjóra.

Helga Gunnarsdóttir hóf störf hjá Akraneskaupstað 1996 þegar grunnskólarnir voru færðir frá ríki til sveitarfélaga. Hún hefur starfað sem yfirstjórnandi skólamála hjá Akraneskaupstað frá þeim tíma. Þá hefur hún einnig stýrt íþrótta-, menningar- og tómstundamálum hjá Akraneskaupstað og frá árinu 2009 félagsþjónustunni þegar  málaflokkarnir voru sameinaðir í fjölskyldustofu og Helga ráðin framkvæmdastjóri. Með stjórnkerfisbreytingum haustið 2014 var málaflokkunum skipt upp að nýju og Helga gegndi stöðu sviðsstjóra skóla- og frístundasviðs þar til hún fór í veikindaleyfi vorið 2015.

„Akraneskaupstaður þakkar Helgu Gunnarsdóttur fyrir afar farsæl störf en hún hefur verið einn af æðstu stjórnendum kaupstaðarins í 20 ár og í forystu fyrir helstu málaflokka sveitarfélagsins,“ segir í frétt frá Akraneskaupstað.