Steina við myndir frá sér á kirkjutröppunum á Akureyri.

Gleðin sem gjöf er heiti ljósmyndasýningar Steinu Matt

Steinunn Matthíasdóttir ljósmyndari í Búðardal hefur sett upp ljósmyndasýninguna Gleðin sem gjöf í kirkjutröppum Akureyrarkirkju. „Sýningin stendur fyrir virðingu og lífsgleði með það í huga að vekja fólk til umhugsunar um virðingu fyrir þeim sem eldri eru og lífsgæðum þeirra. Ljósmyndasýningin er sett upp í samstarfi við Helgu Möller söngkonu í tilefni flutnings hennar á laginu Tegami-bréfið í Akureyrarkirkju sunnudaginn 19. júní síðastliðinn,“ sagði Steina í samtali við Skessuhorn. Ljósmyndaverkin 14 á sýningunni eru hluti af seríu sem telur 64 andlitsmyndir sem Steinunn hefur unnið vegna „Inside Out Project“ og verður sett upp í Búðardal í júlí í sumar.

Um samstarf þeirra Steinunnar og Helgu segir hún: „Sameiginlega vinnum við með hugtakið virðing og viljum vekja athygli á lífsgæðum eldri borgara, mikilvægi þess að finna gleðina sama hvernig lífið leikur okkur og vekja fólk til umhugsunar um hvernig við getum öll átt þátt í að veita gleði.“ Sýningin á kirkjutröppunum er einnig hluti af Listasumri 2016 á Akureyri sem stendur til 31. ágúst nk.

Líkar þetta

Fleiri fréttir