Snorrastofa lýkur litríkri vetrardagskrá sinni þriðjudaginn 31. maí kl. 20:30 með fyrirlestri í hátíðarsal gamla héraðsskólans í Reykholti um gengna merkiskonu, frú Önnu Bjarnadóttur (1897–1991), sem um áratuga skeið bjó þar ásamt manni sínum, sr. Einari Guðnasyni. Héraðsskólinn var hennar starfsvettvangur þar sem hún miðlaði ungum nemendum af brunni yfirburðamenntunar sinnar og þjónaði samfélagi sínu með eftirminnilegum og gefandi hætti. Fyrirlesturinn er hluti fyrirlestraraðar Snorrastofu, Fyrirlestrar í héraði.

Árið 1933 flutti frú Anna í Reykholt og var þá ein menntaðasta kona landsins, nýgift sr. Einari Guðnasyni. Hún átti eftir að setja sterkan svip á héraðið og lýsti löngu síðar þessum breytingum á eigin högum með orðunum; „heimsborgari gerist sveitakona“. Hún hafði siglt strax eftir lok heimsstyrjaldarinnar fyrri, lokið háskólaprófi með láði í Englandi og tekið virkan þátt í Alþjóðasamtökum háskólakvenna sem trúðu á mikilvægi menntaðra kvenna við að koma á friði meðal þjóða. Það er dótturdóttur Önnu, Kristrún Heimisdóttir lögfræðingur, sem segir sögu ömmu sinnar, sem þrátt fyrir einstæð tækifæri úti í hinum stóra heimi vildi snúa heim, ekki síst vegna sterkra tilfinningatengsla við náttúru og bókmenningu Íslands. Heim komin hélt hún háskólafyrirlestra fyrst kvenna á Íslandi, sex í röð um William Shakespeare, alla fyrir fullu húsi í Bárubúð. Anna kenndi ensku í fyrsta útvarpi á Íslandi og var fyrsta konan sem kenndi við Menntaskólann í Reykjavík þar sem hún kenndi íslensku. Anna fékk síðan að kenna á bakslagi samtímans gegn konum á vinnumarkaði, sem lýsti sér í þróun starfsferils hennar. Hann hófst í háskóla og lauk í Héraðsskólanum í Reykholti þar sem hún var annálaður kennari og höfundur kennslubóka í ensku. Föður hennar dr. Bjarni Sæmundssyni náttúrufræðingi fannst hún flytjast inn í afdal en sjálfri fannst henni ritunarstaður Heimskringlu vera í eðli sínu háborg og unni bæði samfélagi og fegurð sveitarinnar alla sína löngu ævi. Frú Anna starfaði ötullega í Kvenfélagi Reykdæla og var lengi formaður þess. Kvenfélagið sér um kaffiveitingar í hléi af þessu tilefni.

Kristrún Heimisdóttir er lögfræðingur að mennt, hefur starfað sem háskólakennari, framkvæmdastjóri Samtaka iðnaðarins og aðstoðarmaður ráðherra, bæði utanríkis og efnahagsmála, en gegnir nú rannsóknarstöðu við Columbíaháskólann í New York. Sumarið 2015 hafði hún ásamt Ævari Kjartanssyni umsjón með þáttaröð á Rás 1 Ríkisútvarpsins á sunnudagsmorgnum sem bar heitið Höfundar eigin lífs – um frelsi og helsi íslenskra kvenna. Tilefni þáttanna var að minnast 100 ára kosningarréttar kvenna.

Að venju verður boðið til umræðna og kaffiveitinga á þessu kvöldi. Aðgangseyrir er 500 kr.

-fréttatilkynning

Heimsborgari gerist sveitakona – fyrirlestur um frú Önnu