ATON húsgögn til sýnis í Norska húsinu

Sýning um húsgagnasmiðjuna ATON, sem var starfrækt í Stykkishólmi á árunum 1968 til 1975, verður opnuð í dag, föstudaginn 27. maí, kl. 17:00 í Norska húsinu, byggðasafni Snæfellinga og Hnappdæla í Stykkishólmi. Það voru þau Dagbjartur Stígsson og Hrafnhildur Ágústsdóttir sem stofnuðu ATON húsgagnasmiðjuna. Hugmyndin af sýningunni kviknaði hjá Hjördísi Pálsdóttur safnastjóra. „Það var eitthvað til af húsgögnum frá ATON húsgagnasmiðjunni í safnaeign. Við auglýstum eftir fleiri húsgögnum á Facebook við mjög góðar undirtektir og höfum við fengið lánuð húsgögn alls staðar að af landinu,“ segir Hjördís. „Þau í ATON unnu mikið með íslenskt hráefni t.d. birki og íslenska ull. Þekktasta framleiðsla þeirra var ruggustóll sem margir þekkja og eiga enn í dag,“ bætir hún við. Húsgagnasmiðjan framleiddi m.a. húsgögn fyrir Húsgagnahöllina, kaffiteríuna á Hótel Loftleiðum og Bautann á Akureyri, auk þess að sérstök ATON deild var í JL húsinu í Reykjavík á sínum tíma.

Sýningin mun standa til áramóta og í sumar verður hún opin alla daga frá kl 11-18.

Líkar þetta

Fleiri fréttir