Lilja Rannveig Sigurgeirsdóttir.

Vill að byggð verði heimavist fyrir ungmenni af landsbyggðinni

Í grein í Fréttablaðinu 17. maí síðastliðinn vekur Lilja Rannveig Sigurgeirsdóttir, framhaldsskólanemi frá Bakkakoti í Borgarfirði, máls á húsnæðisvanda námsfólks af landsbyggðinni þegar það sækir nám á höfuðborgarsvæðið. Greinin ber fyrirsögnina „Heimilislausir námsmenn af landsbyggðinni.“ Þar segir Lilja meðal annars: „Stöðug umræða er um húsnæðisvandamál stúdenta og barnafjölskyldna, enda er staða þeirra grafalvarleg. En á sama tíma er annar hópur í stöðugri húsnæðisleit en er hvergi í forgangi. Þetta er ungt fólk sem flytur af landsbyggðinni til að stunda nám í einhverjum af þrettán framhaldsskólum höfuðborgarsvæðisins. Á höfuðborgarsvæðinu er mesta fjölbreytni landsins í náms- og vinnuframboði og því vel skiljanlegt að unglingar leiti þangað til að fara í framhaldsskóla.“

Lilja Rannveig segir að það að byrja í framhaldsskóla sé mikil breyting. „Breytingin er enn meiri fyrir þá sem neyðast til þess að flytja frá fjölskyldu sinni til að stunda það nám sem þeir vilja. Sem betur fer eru heimavistir og nemendagarðar um allt land þar sem nemendur geta búið sér til heimili út skólagönguna. Nema það er ekki í boði á höfuðborgarsvæðinu. Allar lausnir á húsnæðisvanda ungs fólks beinast að barnafólki og háskólafólki. Það þýðir að ef ungmenni vill stunda nám á höfuðborgarsvæðinu þá eru miklar líkur á því að húsnæðisvandamál hefjist á sextánda aldursári.“

Lilja telur að heimavist á höfuðborgarsvæðinu væri skref í rétta átt til að betrumbæta stöðu aðfluttra framhaldsskólanema. Hún segir að hér á landi séu 12 heimavistir fyrir framhaldsskólanema en engin þeirra er á höfuðborgarsvæðinu. „Nemandi á höfuðborgarsvæðinu á betri möguleika á því að stunda nám hvar sem er á landinu heldur en nemandi af landsbyggðinni að stunda nám á höfuðborgarsvæðinu. Nemendur á Íslandi hafa rétt á því að stunda nám þar sem þeir vilja á grundvelli jafnréttislaga.“ Lilja skorar á stjórnvöld að leysa þennan vanda.

 

Líkar þetta

Fleiri fréttir