Blaðamaður Skessuhorns var fyrir hádegi í dag viðstaddur þegar nokkrir frambjóðendur eða fulltrúar þeirra mættu með meðmælendalista til yfirkjörstjórnar í Norðvesturkjördæmi vegna forsetakosninganna í sumar. Yfirkjörstjórn hafði auglýst að hún tæki á móti frumriti meðmælendalista milli klukkan 10 og 12 í dag í húsnæði Héraðsdóms Vesturlands í Borgarnesi. Meðan blaðamaður átti viðdvöl komu í húsnæði dómsins fulltrúar Guðna Th Jóhannessonar, Hildar Þórðardóttur og auk þess Ástþór Magnússon í eigin persónu. Óli Björn Kárason blaðamaður og fyrrverandi alþingismaður var einnig mættur með meðmælalista undir hönd en hann vildi ekki gefa uppi fyrir hvern hann væri að skila inn meðmælendalista og vildi yfirleitt alls ekkert ræða við blaðamann. Að líkindum var Óli Björn að skila inn lista fyrir framboð Davíðs Oddssonar.

Alls höfðu 14 einstaklingar boðað framboð til forseta. Samkvæmt heimildum á kjarninn.is má ætla að Baldur Ágústsson, Benedikt Kristján Mewes, Elísabet Jökulsdóttir, Magnús Ingi Magnússon og Magnús Ingberg Jónsson nái ekki að vera með í baráttunni um Bessastaði í vor. Þau nái líklega ekki nægum fjölda meðmælenda, sem þau eiga að skila í dag.

: Ástþór Magnússon mætti sjálfur og kvaðst vera fyrir löngu búinn að safna tilskyldum fjölda meðmælenda.

: Sigurlaug Vilhjálmsdóttir var mætt með meðmælendalista fyrir Hildi Þórðardóttur.

: Þorgerður Anna Arnardóttir og Pétur Hrafn Árnason voru fulltrúar Guðna Th Jóhannessonar forsetaframbjóðanda.

: Óli Björn Kárason vildi ekki upplýsa blaðamann Skessuhorns um fyrir hvern hann væri að skila inn meðmælendalista.

Straumur í héraðsdóm með meðmælendalista