Í miklu fannfergi getur verið hættulega stutt upp í háspennulínur.

Ferðafólk til fjalla fari með gát

Að venju má búast við að ferðalög á fjöllum aukist um páskana. Landsnet vill í tilkynningu benda á að víða á hálendinu getur verið hættulega stutt upp í háspennulínur vegna mikilla snjóalaga. „Þá skal áréttað að háspennulínur eru ekki alltaf sýnilegar vegna snjóa og slæms skyggnis. Í miklu fannfergi minnkar bil frá jörðu að línu og ísing getur leitt til þess að línur sígi mikið,“ segir í tilkynningu. Ítrekað er að við verstu aðstæður geti leiðarar verið á kafi í snjó og því lífsnauðsynlegt að gæta ýtrustu varúðar.

„Allir sem ætla að fara á fjöll, bæði vélsleða-, skíða- og göngufólk, er því hvatt til að fara með mikilli gát nærri háspennulínum og möstrum. Góð regla er að athuga hvort og þá hvar háspennulínur liggja um þau svæði sem ferðast skal um, áður en lagt er af stað,“ segir í tilkynningu Landsnets.

Líkar þetta

Fleiri fréttir