Veður á Vesturlandi
Meðfylgjandi er skjáskot af vindaspá Veðurstofunnar fyrir klukkan 22 í kvöld, sunnudag. Mjög hvasst verður þá um norðvestanvert landið og m.a. á norðanverðu Snæfellsnesi einnig.

Hvessir enn á ný í síðdegis – varað við ferðalögum

Spáð er stormi eða roki á landinu seinni partinn í dag og enn hvassara veðri í kvöld. Hvassast verður um norðvestanvert landið og á norðanverðu Snæfellsnesi. Samhliða þessu verður asahláka með rigningu og má búast við talsvert miklu leysingavatni í ám og lækjum þegar líður á kvöldið. Veðurstofa segir viðbúið að aukið álag verði á afrennsliskerfi bæja og bendir á að gott er að hreinsa vel frá niðurföllum og útidyrum kjallara. Á morgun gengur sunnanáttin smám saman niður og samhliða því kólnar heldur að nýju um vestanvert landið.

 

Ekkert ferðaveður

„Hviður upp á 40-50 m/s verða veginum við Hafnarfjall frá því um kl. 16 í dag. Eftir kl. 17-18 verður hættulega hvasst af suðri upp á öll ferðalög að gera, allt frá Hvalfirði vestur úr og norður í Eyjafjörð.  Gengur ekki niður fyrr en í nótt,“ segir orðrétt í tilkynningu frá Vegagerðinni í morgun.

 

Þrátt fyrir leiðinda veður undanfarinn sólarhring hefur helgin fram að þessu verið róleg hjá björgunarsveitum á landinu. Þó voru sveitir kallaðar út vegna foks í gær á Akranesi og í Borgarnesi. Í báðum tilvikum var um minniháttar atvik að ræða.

Líkar þetta

Fleiri fréttir