medium

large

thumbnail

1536x1536

2048x2048

small

custom-size

Nýjar verklagsreglur um flutning á lömbum

Karlakórinn Heiðbjört lýkur vetri í Reykholti

Búið að ráða viðburðastjóra

Bjarki Pétursson varð í sjöunda sæti

Snæfell kom sér inn í einvígið gegn Tindastól

Gleði og glaumur á söngleiknum Grease

core/freeform

Svo mikil umferð ferðafólks er að Kirkjufellsfossi við Grundarfjörð að óhætt er að segja að svæðið sé sprungið. Meðfylgjandi mynd var tekin í morgun og lýsir ástandinu þótt enn sé hávetur. Þá voru þrjár rútur á svæðinu og einni þeirra lagt í vegkantinum þannig að hún tók helminginn af annarri akgreininni og skapaði því mikla hættu. Fossinn er í innlendum sem erlendum ferðatímaritum og netmiðlum skilgreindur sem einn fallegasti viðkomustaður sem um getur. Því er umferðin slík að keyrt hefur úr hófi. Ágangur ferðafólks nú í vetur er t.a.m. mun meiri en landeigendur á svæðinu geta sætt sig við og verða þeir fyrir töluvert miklu ónæði og ágangi af þessum sökum. Umferðin er svo mikil bæði að degi sem nóttu að bílastæði sem ætluð eru þeim sem vilja ganga upp að fossinum eru iðulega yfirfull og leggur þá fólk bílum í vegaxlir þannig að töluverð slysahætta skapast á þjóðveginum. Starfsfólk ferðaskrifstofa ekki síður en ferðamenn á eigin vegum, taka ekki tillit til vegmerkinga, svo sem um að bannað sé að leggja á veginum og nærliggjandi afleggjara í beitiland fyrir búpening heimafólks. Í náttúruverndarlögum segir að bannað sé að selja og skipuleggja ferðir á annarra manna land nema með leyfi. Slíkt virða ekki allar ferðaskrifstofur.

Vorið 2014 var gerður samningur milli landeigenda Kirkjufellsjarðarinnar og Grundarfjarðarbæjar um að eigendur legðu til land undir bílastæði og leyfðu gerð göngustígar upp að og með fossinum. Engan óraði fyrir því vorið 2014 að umferðin ætti eftir að margfaldast með þessum hætti, en þróunin hefur engu að síður orðið sú að allir sem til þekkja telja svæðið vera sprungið af ágangi gesta. Það er skoðun viðmælenda sem Skessuhorn hefur rætt við að bílastæðin séu í raun nógu stór fyrir þann fjölda fólks sem svæðið ber og æskilegt er að komist að fossinum hverju sinni. Þá segja aðrir að vandamálið sé skortur á merkingum fleiri áhugaverðra staða á Snæfellsnesi þannig að ferðafólk geti stoppað bíla sína víðar og þannig dreift álaginu og mannfjöldanum.

Landeigendur við Kirkjufellsfoss eru nokkrir. Þeir standa ekki fyrir ferðaþjónustu og hafa ekki áhuga á því á þessum stað samkvæmt heimildum Skessuhorns. Sjá þeir eftir að hafa leyft gerð bílastæða og göngustíga því átroðningur hefur verið mikill og framkoma sumra gesta ekki til þess fallin að auka áhuga þeirra fyrir ferðaþjónustu. Sitja þeir því uppi með stöðugt áreiti, óþrifnað, jafnvel illt umtal, og ómælda vinnu. Vilja helst loka svæðinu.

Svæðið við Kirkjufellsfoss sprungið af ágangi ferðafólks