medium

large

thumbnail

1536x1536

2048x2048

small

custom-size

Skíðasvæði Snæfellsness blæs í herlúðra

Lokakeppni Vesturlandsdeildar 2024

Snæfell tapaði fyrir Fjölni í körfunni

Háskólinn á Bifröst – uppskeruhátíð nýsköpunar

Frítekjumark námsmanna hækkar og ábyrgðarmannakerfið kvatt

Undirskrifaður samningur Borgarbyggðar og Sjamma ehf

core/freeform

Þorvaldur Víðisson biskupsritari ritaði nýverið formönnum sóknarnefnda í Staðastaðarprestakalli á Snæfellsnesi bréf þar sem tilkynnt var um ákvörðun Agnesar Sigurðardóttur biskups um að aflétta búsetuskyldu sóknarprests á kirkjustaðnum Staðastað. Samkvæmt heimildum Skessuhorns er prestsbústaðurinn talinn óíbúðarhæfur sökum myglusvepps. Í bréfi biskupsritara kemur ekki fram hvort ákvörðun þessi er varanleg eða til skamms tíma. Séra Þorvaldur Víðisson staðfestir í samtali við Skessuhorn að ákvörðun þessi feli í sér að prestur getur nú ákveðið hvar búseta hans verður. Ekki hefur verið tekin ákvörðun um byggingu nýs prestsbústaðar á kirkjustaðnum.

Í bréfinu kemur fram að biskup og sóknarprestur munu í sameiningu vinna að því að finna samastað í prestakallinu fyrir skrifstofu sóknarprests. „Biskupi er umhugað um að prestsþjónustan í prestakallinu sé tryggð,“ segir í bréfinu, sem endar á þann veg: „Þótt forsendur hafi breyst varðandi búsetu sóknarprestsins er það von biskups að trúnaðarmenn kirkjunnar í sóknarnefndum ásamt sóknarpresti skipuleggi nú í sameiningu hina kirkjulegu þjónustu í prestakallinu út frá þessum nýju forsendum og með hagsmuni sóknarbarna að leiðarljósi.“

Í opnu og fremur harðorðu bréfi sem Ólína Gunnlaugsdóttir á Ökrum, ritari í sóknarnefnd Hellnakirkju, ritar Agnesi Sigurðardóttur biskupi Íslands, er því mótmælt að biskup hafi aflétt búsetuskyldu sóknarprests á Staðastað. Ólína lýsir vonbrigðum sínum með ákvörðun biskups. „Við erum orðlaus og lýsum vonbrigðum og réttlátri reiði. Án vitundar, hvað þá samráðs, hefur þú svift prestakallið prestssetri sínu, samþykkt að sóknarprestur flytji upp á sitt einsdæmi úr prestakallinu og að hann sinni ekki starfi sínu sem slíkur! Þrátt fyrir ítrekaðar athugasemdir, bæði skriflegar og munnlegar, jafnvel á fundum með þér sjálfri, hunsar þú okkur sóknarbörn Staðastaðarprestakalls, gerir lítið úr tilveru okkar hér sem meðlimir Þjóðkirkjunar og starfi okkar sem höfum unnið sem ,,trúnaðarmenn kirkjunnar” eins og þú kallar það,“ ritar Ólína í bréfi sínu til biskups sem hún birtir á Facebook síðu sinni.

Biskup afléttir búsetuskyldu sóknarprests á Staðastað