Smit greint í Grundarfirði og sjö að auki komnir í sóttkví

Búið er að greina einstakling í Grundarfirði með Covid-19 og eru sjö sem tengjast viðkomandi komnir í sóttkví. Björg Ágústsdóttir bæjarstjóri greinir frá þessu í tilkynningu. Frekari sýnatökur eru undirbúnar í dag á vegum Heilbrigðisstofnunar Vesturlands. „Við höfum verið lánsöm hingað til, með fjölda smita, en við skulum búa okkur undir að fleiri smit geti greinst hér á næstu dögum í ljósi þess hvernig útbreiðslan hefur verið á landinu síðustu vikur. Frekari upplýsingar eiga eftir að berast okkur í dag um stöðuna, en nú fara af stað enn frekari ráðstafanir hjá Grundarfjarðarbæ og stofnunum okkar og munu tilkynningar birtast á vef Grundarfjarðarbæjar,“ skrifar Björg.

Hún brýnir fyrir íbúum að halda áfram að fylgja fyrirmælum og leiðbeiningum almannavarna og landlæknis. „Förum varlega, hugum að sóttvörnum hver fyrir sig og sína, handhreinsun, notkun andlitsgríma þar sem ekki er hægt að halda fjarlægðarmörk og munum að eldra fólk og þau sem hafa langvinna sjúkdóma eru sérstaklega viðkvæm.  Við kunnum þetta og höldum því ró okkar. Við sendum hlýjar kveðjur til þeirra sem veikjast. Við komumst í gegnum þetta verkefni með því að standa saman, sýna hvert öðru virðingu og hjálpsemi,“ skrifar Björg.

Líkar þetta

Fleiri fréttir