Skrúðgarðurinn var vígður eftir endurbætur 17. júní síðastliðinn. Ljósm. Akraneskaupstaður.

Ítrekað unnin skemmdarverk í Skrúðgarði

Í sumar réðist Akraneskaupstaður í talsverðar endurbætur á Skrúðgarði bæjarins, sem staðsettur er við Suðurgötu. Gosbrunnur var lagfærður og listaverkinu Stúlka með löngu eftir Guðmund Einarsson frá Miðdal komið fyrir á sínum stað. Þá var einnig gróðursett talsvert af fjölbreyttum runnum, fjölæringum og sumarblómum við brunninn. Mikil ánægja var með endurbæturnar og garðurinn hefur hlotið líf að nýju. En friðurinn um garðinn er úti því skemmdarvargar hafa ekki getið látið í friði þessar fallegu lagfæringar í umhverfinu. Í tvígang 30. júlí síðastliðinn rifu þeir upp plöntur sem búið var að gróðursetja í kringum gosbrunninn og hent þeim ofan í vatnið ásamt grjóti úr steinlögn í kringum beðið. „Þetta er ekki í fyrsta skiptið sem slík skemmdarverk eiga sér stað í Skrúðgarði bæjarins en síðustu tvö sumur hefur garðyrkjudeild bæjarins þurft að gróðursetja sömu sumarblómin oft yfir sumarið,“ segir í frétt á vef Akraneskaupstaðar. Þar segir að búið sé að hafa samband við lögregluna sem mun auka eftirlit með garðinum. Ef einhver hefur orðið var við þessi skemmdarverk, sem voru unnin 30. júlí, eða hefur upplýsingar sem tengjast þeim er fólk vinsamlegast beðið um að hafa samband við lögregluna á Akranesi.

Líkar þetta

Fleiri fréttir