medium

large

thumbnail

1536x1536

2048x2048

small

custom-size

Grásleppusjómenn fagna lengingu veiðitímabilsins – myndasyrpa

Hlynur Blær gefur bílum nýjan blæ

Brúin komin á sinn stað yfir Berjadalsá

ÞB Borg reisir glæsihýsi í Stykkishólmi

Brást illa við afskiptum lögreglu

Fjölmenningarskóli Vesturlands tekinn til starfa

core/freeform

Snæfell beið lægri hlut gegn Álftanesi þegar liðin mættust í 1. deild karla í körfuknattleik í gærkvöldi. Leikið var í Stykkishólmi. Eftir jafnan og spennandi fyrri hálfleik tóku gestirnir stjórnina í þeim síðari og sigruðu að lokum með 13 stigum, 77-90.

Jafnræði var með liðunum framan af fyrsta leikhluta og þau skiptust á að leiða. Snæfellingar luku upphafsfjórðungnum með góðum kafla og höfðu sex stiga forskot að honum loknum, 20-14. Gestirnir komu sér alveg upp að hlið Hólmara snemma í öðrum fjórðungi og náðu síðan forystunni. Snæfellingar fylgdu þeim eins og skugginn síðustu mínútur fyrri hálfleiks og aðeins munaði einu stigi á liðunum í hléinu. Álftanes leiddi með 47 stigum gegn 46 stigum Snæfellinga.

Gestirnir juku forystu sína í fjögur stig í upphafi síðari hálfleiks áður en Snæfellingar minnkuðu muninn í eitt stig í stöðunni 49-50. Eftir það skildu leiðir. Hólmarar skoruðu aðeins fimm stig til viðbótar það sem eftir lifði þriðja leikhluta gegn 24 stigum gestanna. Álftanes leiddi því með 20 stigum fyrir lokafjórðunginn, 54-74. Snæfellingar reyndu hvað þeir gátu að vinna á forystu gestanna, náðu að minnka muninn í tíu stig þegar fjórði leikhluti var hálfnaður en nær komust þeir ekki. Að lokum fór svo að Álftanes sigraði 77-90.

Anders Gabriel Andersteg var atkvæðamestur í liði Snæfells með 24 stig og átta fráköst. Brandon Cataldo skoraði 16 stig, tók tólf fráköst og varði fimm skot, Ísak Örn Baldursson skoraði 14 stig, Benjamín Ómar Kristjánsson og Aron Ingi Hinriksson voru með átta stig hvor, Guðni Sumarliðason skoraði sex stig og tók sex fráköst og Ellert Þór Hermundarson skoraði eitt stig.

Samuel Prescott jr. fór fyrir liði Álftnesinga með 30 stig og fimm stolna bolta. Vilhjálmur Kári Jensson skoraði 14 stig og tók sjö fráköst, Dúi Þór Jónsson skoraði tólf stig og tók tíu fráköst og Brynjar Magnús Friðriksson var með ellefu stig og níu fráköst.

Snæfellingar sitja á botni deildarinnar með fjögur stig, jafn mörg og Sindri í sætinu fyrir ofan en hafa leikið tveimur leikjum meira. Næst leika Hólmarar gegn Breiðabliki á útivelli á fimmtudaginn, 12. mars.

Leiðir skildu í seinni hálfleik