ARN

Pósturinn hættir dreifingu fjölpósts á Akranesi og víðar

Frá og með 1. maí næstkomandi mun Íslandspóstur hætta dreifingu á ónafnamerktum fjölpósti á Akranesi, Reykjanesi, Selfossi og höfuðborgarsvæðinu. Pósturinn mun halda áfram að bjóða upp á dreifingu á fjölpósti á öðrum svæðum landsins og í dreifbýli. Þessi breyting er sögð leiða til um 200 milljóna króna lækkunar kostnaðar á ársgrundvelli hjá fyrirtækinu, en sömuleiðis að yfir 30 starfsmönnum á fyrrgreindum svæðum verður tilkynnt um uppsögn í dag. „Magn fjölpósts hefur dregist mikið saman á undanförnum árum og mikil fækkun almennra bréfa hefur haft það í för með sér að minni samlegðaráhrif eru á dreifingu bréfapósts og fjölpósts,“ segir í tilkynningu frá fyrirtækinu. „Áður fóru bréfberar í nær öll hús með bréf og því féll það vel að starfseminni að dreifa fjölpósti á sama tíma en nú hefur bréfum fækkað svo mikið að oft fara bréfberar eingöngu með fjölpóst en engin bréf og því er lítill rekstrargrundvöllur fyrir þessari þjónustu.“

Þá segir í tilkynningunni að einnig beri að horfa til þess að sífellt stærri hópur almennings vill ekki fá fjölpóst, m.a. vegna umhverfissjónarmiða, og hefur sá hópur stækkað mikið á síðustu misserum. „Sú þróun mun halda áfram með aukinni umhverfisvitund almennings og þróun á stafrænum lausnum. Þetta leiðir til þess að mikið magn pappírs sem sent er í dreifingu verður eftir í kerfi Póstsins sem flækir starfsemina og skapar kostnað og óhagræði.“

Boðuð breyting Íslandspósts mun hafa áhrif á um 40 starfsmenn en mögulegt er að færa um tíu starfsmenn til í starfi innan fyrirtækisins. „Rúmlega 30 starfsmönnum verður því sagt upp störfum frá og með deginum í dag og er þar um að ræða starfsmenn í flokkun og dreifingu á svæðinu sem um ræðir. Rætt verður við þá starfsmenn sem missa vinnuna í dag en ekki verður óskað eftir starfsframlagi á uppsagnartímanum. Að auki verður þeim starfsmönnum sem missa vinnuna boðinn stuðningur við starfslokin svo sem sálfræðiþjónusta og ráðgjöf við atvinnuleit. Pósturinn hefur tilkynnt uppsagnirnar til Vinnumálastofnunar, stéttarfélaga og annarra sem hlut eiga að máli.“

Birgir Jónsson forstjóri Íslandspósts segir að mikil endurskipulagning fari þessi misserin fram á starfsemi Íslandspósts og eru framangreindar aðgerðir hluti af því ferli. „Umbreyting fyrirtækisins hefur gengið vel og nú þegar má merkja viðsnúning í rekstrinum en ljóst er að verkefninu er hvergi nærri lokið og betur má ef duga skal. Við erum önnum kafin við að aðlaga reksturinn að kröfum á nútíma markaði en í svona endurskipulagningu þarf að horfast í augu við staðreyndir og taka margar erfiðar ákvarðanir, þessi ákvörðun er ein þeirra,“  segir Birgir.

Líkar þetta

Fleiri fréttir