Rómantísk mynd frá Búðum á Snæfellsnesi. Ljósm. úr safni.

Helstu niðurstöður fyrirtækjakönnunar á Vesturlandi

Samtök sveitarfélaga á Vesturlandi hafa birt niðurstöður fyrirtækjakönnunar sem unnin var fyrir landbyggðina og birtist í nýju vefriti sem nefnist Deiglan. Höfundur skýrslunnar er Vífill Karlsson hagfræðingur. Niðurstöðurnar byggja á spurningakönnun sem var lögð fyrir fyrirtæki í öllum landshlutum, utan höfuðborgarsvæðisins, frá nóvember til loka janúar á þessu ári. Nokkuð mörg fyrirtæki af höfuðborgarsvæðinu voru engu að síður með í könnuninni en það helgast af því að þau starfa einnig á landsbyggðinni. Rúmlega 2000 fyrirtæki tóku þátt í könnuninni.

Þegar niðurstöður voru skoðaðar fyrir Vesturland sérstaklega, og þær bornar saman við aðra landshluta, kom m.a. í ljós að styrkleikar svæðisins felast í nokkuð miklum vilja fyrirtækjanna til að ráða fólk með skólagöngu að baki. „Því má segja að fyrirtæki á Vesturlandi vilji sækja fram í þekkingardrifinni framleiðslu eða þjónustu. Þá var vinnuaflsvægið hvergi hærra. Það þýðir að fyrirtæki á Vesturlandi eru mjög vinnuaflsfrek í samanburði við önnur landsvæði. Að auki lenti landshlutinn í öðru sæti þegar horft var til skapandi greina. Það var eingöngu atvinnulíf á Vestfjörðum sem var duglegra við að byggja afkomu sína á skapandi greinum.

Á Vesturlandi var að finna bæði landsvæði með fyrirtæki sem sýndu einna bestu afkomuna til lengri tíma litið og fyrirtæki með einna verstu afkomuna. Dalirnir komu illa út hvað varðar fjölgun eða fækkun starfsfólks. Einnig varðandi þörfina fyrir menntað vinnuafl og vinnuafl með sérstaka færni en hún er einstaklega lítil þar. Einnig ráku Dalir lestina varðandi fjárfestingarhug, viðskipti við ferðaþjónustufyrirtæki og væntingar um tekjur á næsta ári. Þá var hugur til fjárfestinga óvenju lítill hjá fyrirtækjum á Akranessvæðinu og ferðaþjónusta veik á Akranesi. Afkoma til lengri tíma kom illa út á Borgarfjarðarsvæði,“ segir um helstu niðurstöður könnunarinnar.

Samtök sveitarfélaga á Vesturlandi leiddu vinnuna við gerð könnunarinnar, en hún er samstarfsverkefni atvinnuþróunarfélaga, Byggðastofnunar og landshlutasamtaka á Íslandi og er þetta önnur skýrslan sem kemur út á vegum SSV. Ætlunin er að halda því áfram og gera könnun meðal fyrirtækja og íbúa um land allt með reglubundnum hætti auk annarra tilfallandi verkefna. Samstarfsvettvangurinn mun gefa út efni sitt í vefriti sem kallað er Deigla og kemur fyrst út samhliða niðurstöðum könnunarinnar undir því nafni.

Sjá skýrsluna í heild sinni hér.

Líkar þetta

Fleiri fréttir