Alda Vilhjálmsdóttir og Ursula Árnadóttir, nýr formaður RKÍ deildarinnar á Akranesi.

Formannsskipti hjá RKÍ á Akranesi og Hvalfjarðarsveit

Rauði krossinn á Akranesi og Hvalfjarðarsveit hélt aðalfund sinn 18. febrúar síðastliðinn. Á fundinum var Ursula Árnadóttir kosin formaður en Alda Vilhjálmsdóttir sem gegnt hefur formennsku um áraraðir gaf ekki kost á sér til endurkjörs.

Tilgangur Rauða krossins er að vernda líf og heilsu og tryggja virðingu fyrir mannlegu lífi, vinna að gagnkvæmum skilningi, vináttu og samstarfi meðal manna. Hreyfingin gerir engan mun á milli manna eftir þjóðerni, uppruna, trúarbrögðum, kyni, stétt eða stjórnmálaskoðunum.

Á Akranesi er unnið ötullega að markmiðum hreyfingarinnar og þar starfa nokkrir hópar í þeim tilgangi, t.d. heimsóknarvinir, prjónahópur, barnahópur, skvísuhópur fyrir konur úr hópi nýbúa, matarhópur þar sem framandi menning og matur er kynntur. Auk þess býður deildin uppá námskeið í skyndihjálp og er eitt slíkt ráðgert 1. apríl n.k. og skráning stendur yfir. Í vor verður boðið uppá námskeiðið Börn og umhverfi. Til fjáröflunar hefur deildin haft til sölu lopapeysur og ýmislegt fleira. Ef einhverjir eiga lopapeysur sem viðkomandi vill gefa til góðs málefnis, þá má gjarnan koma með þær til okkar, jafnvel hálfkláraðar peysur. Félagið er með starfsemi sína í eign húsnæði að Skólabraut 25a á Akranesi og þar er opið frá kl. 10 – 14 mánudaga, miðvikudaga og föstudaga. Nýir og gamlir félagar eru hjartanlega velkomnir.

-fréttatilkynning

Líkar þetta

Fleiri fréttir

Hart á hrossum

Matvælastofnun brýnir fyrir hrossaeigendum að koma heyi í útigangshross og huga vel að ástandi þeirra nú þegar rofað hefur til... Lesa meira