Fulltrúar verkefnisins Kynnum kindina; Magnea Jónasdóttir og Arnþór Ævarsson. Ljósm. Matís.

Kynnum kindina sigraði fyrsta Lambaþonið

Verkefnið „Kynnum kindina“ bar sigur úr býtum í fyrstu keppni Lambaþons sem fram fór á Hvanneyri um liðna helgi. Keppt var um bestu hugmyndina til að auka verðmætasköpun í virðiskeðju sauðfjár. „Kynnum kindina“ gengur út á að kynna kindur sem aðdráttarafl fyrir ferðamenn og gefa þeim kost á að upplifa með auðveldum hætti ýmis störf í sveitum landsins sem tengjast sauðfé. Sigurliðið skipuðu Arnþór Ævarsson, Magnea Jónasdóttir og Kári Gunnarsson og hlutu þau 200 þúsund í verðlaun. Sigurliðið hefur jafnframt komið hugmyndavinnunni skrefi lengra þar sem enskt vinnuheiti „Sheepadvisor“ var nefnt sem möguleg leið til að komast nær erlendum gestum lands og þjóðar með þær upplýsingar sem kynna þarf fyrir erlendum ferðamönnum, hvor svo sem þær snúast um hvar má bragða á réttum sem unnir eru úr sauðfjárafurðum, hvar vörur úr íslenskri ull eru seldar, hvaða viðburðir eru á döfinni sem viðkoma sauðfjárrækt eða hvað annað sem þurfa þykir.

Alls kepptu sex lið í keppninni, sem var hnífjöfn. „Mikil hugmyndaauðgi einkenndi keppendur og voru margar hugmyndir um áframhaldandi þróun og samstarf á lofti við lok keppninnar,“ segir í tilkynningu Matís sem stóð fyrir keppninni í samstarfi við Landbúnaðarháskóla Íslands, Háskólann á Bifröst, Landgræðsluna, Ráðgjafamiðstöð landbúnaðarins, Matvælastofnun, Landssamtök sauðfjárbænda, Samtök ungra bænda, Háskóla Íslands og Icelandic Lamb. Dómnefnd í keppninni skipuðu Guðjón Þorkelsson formaður, Arnar Bjarnason, Bryndís Geirsdóttir, Gunnfríður Hreiðarsdóttir og Ragnheiður Héðinsdóttir.

Líkar þetta

Fleiri fréttir