Kvenfélagskonur héldu vinkvennafund

Kvenfélag Hellissands hélt vinkvennafund í félagsheimilinu Röst síðastliðið mánudagskvöld. Buðu þær kvenfélagskonum í Kvenfélagi Ólafsvíkur og vinkonum þeirra að slást í hópinn. Vel var mætt en um 80 kvenfélagskonur og vinkonur þeirra mættu og áttu skemmtilegt kvöld. Boðið var upp á fiskisúpu, brauð og meðlæti ásamt kökum í eftirrétt. Þema kvöldsins var hatta- og/eða hárskraut og vakti það lukku. Kona kvöldsins var valin, gestur kvöldsins og verðlaun voru veitt fyrir hatt kvöldsins.

Það voru þeir Albert Eiríksson og Bergþór Pálsson sem völdu hatt kvöldsins en þeir sáu um skemmtiatriði. Höfðu þeir með sér ferðafélaga, Pál Bergþórsson veðurfræðing, föður Bergþórs. Ræddu þeir Albert og Bergþór um borðsiði og ýmislegt tengt því að mæta í veislu. Sögðu þeir skemmtilega frá og vöktu mikla kátínu. Áður en þeir félagar kvöddu sáu þeir um að draga út í happadrætti sem þær stöllur í Kvenfélagi Hellissands stóðu fyrir. Voru vinningarnir veglegir og vöktu lukku. Heppnaðist kvöldið hið besta.

Líkar þetta

Fleiri fréttir