Prestssetrið á Saurbæ á Hvalfjarðarströnd. Ljósm. mm.

Leggja til afnám prestakalls og búsetuskyldu í Saurbæ

Fyrir kirkjuþingi sem hófst í dag liggur tillaga um að Saurbæjarprestakall og prestssetrið í Saurbæ á Hvalfjarðarströnd verði lagt niður þegar frá næstu mánaðamótum og búsetuskylda prests jafnframt aflögð á staðnum. Tillöguna flytur Stefán Jónsson kirkjuráðsmaður. Lagt er til að Saurbæjarsókn, Innra-Hólmssókn og Leirársókn verði sameinaðar Garðaprestakalli á Akranesi meðal annars til að starfsálag presta í sameinaðri sókn verði jafnað. Eins og greint var frá í Skessuhorni fyrr á þessu ári hafa staðið yfir viðgerðir á prestsbústaðnum í Saurbæ vegna myglu sem greinst hefur í húsinu sökum raka. Grunur lék á að viðgerðir á húsinu hefðu ekki komið í veg fyrir myglu og flutti sóknarprestur og fjölskylda ekki inn í húsið að nýju eftir viðgerðir og hafa haldið til í Kópavogi undanfarna mánuði. Í tillögu til kirkjuþings er einmitt meginástæða tillögunnar sögð vera kostnaðarsamar viðgerðir á prestsbústaðnum vegna raka og myglu sem ekki sjái fyrir endann á. Bætist sá kostnaður við húsaleigu í Kópavogi vegna tímabundinnar búsetu sóknarprests þar sem og ferðakostnaðar.

Í greinargerð með tillögunni segir m.a. að á kirkjuþingi 2012 hafi verið lögð fram tillaga um sameiningu Garða- og Saurbæjarprestakalla. Var tillagan endurflutt á kirkjuþingi 2013, en dregin til baka. Á biskupafundi fyrr á þessu ári var lögð fram tillaga um sameiningu prestakallanna og lagt til að þrír prestar yrðu starfandi í sameinaðri sókn sem teldi hátt í átta þúsund íbúa. Gengið er út frá því í tillögunni sem liggur fyrir kirkjuþingi að hlutaðeigandi sóknarpresti verði áfram tryggt prestsembætti á því svæði sem Saurbæjarprestakall nær til, með því að fá skipun sem prestur í hinu stækkaða prestakalli.

Forkastanleg vinnubrögð

Samkvæmt heimildum Skessuhorns hefur ekki verið leitað samráðs við sóknarnefndir í Saurbæjarprestakalli vegna flutnings tillögunnar, né heldur hlutaðeigandi sóknarprest. Það staðfestir séra Kristinn Jens Sigurþórsson í viðtali við fréttavefinn ruv.is í gær. Hann segir að ekkert hafi verið rætt við hann um málið, ekki verið kallað eftir umsögnum um málið heima í héraði og málið ekki farið fyrir safnaðarnefndir og sóknarnefndir eins og hefðbundið er þegar um tillögur varðandi prestakallaskipan er að ræða. Vegna fréttar RUV hafa sóknarbörn í Saurbæjarprestakalli þegar tekið undir gagnrýni séra Kristins Jens á Þjóðkirkjuna vegna samráðsleysis, meðal annars Haraldur Benediktsson bóndi á Vestra-Reini og fyrsti þingmaður NV kjördæmis, sem skrifaði ítarlegan pistil um málið á Facebook síðu sína og sagði m.a.: „Vinnubrögð, aðferðafræði og framganga yfirvalda þjóðkirkjunnar eru í þessu máli forkastanleg.“

Sjá nánar pistil Haraldar hér.

Líkar þetta

Fleiri fréttir