Guðrún Björg Aðalsteinsdóttir, skólameistari MB og Signý Jóhannesdóttir, formaður StéttVest, skrifa undir samkomulagið. Ljósm. Menntaskóli Borgarfjarðar.

Samið um endurgreiðslu sálfræðiþjónustu

Nýverið skrifuðu Guðrún Björg Aðalsteinsdóttir, skólameistari Menntaskóla Borgarfjarðar, og Signý Jóhannesdóttir, formaður Stéttarfélags Vesturlands, undir samkomulag milli MB og sjúkrasjóðs StéttVest um stuðning við nemendur í formi endurgreiðslu á sálfræðiþjónustu. Samningurinn gildir út skólaárið 2019-2020 og er hugsaður sem forvörn gegn brottfalli nemenda úr skóla. Sjóðurinn hefur áður styrkt nemendur MB með þessum hætti, undanfarin tvö skólaár, en nú var í fyrsta sinn samið um málið til tveggja ára.

Hver nemandi getur fengið endurgreiðslu eða styrk fyrir allt að fjórum sálfræðitímum á hverju skólaári, gegn tilvísun námsráðgjafa MB. Skólinn greiðir fyrsta tímann en sjúkrasjóður StéttVest næstu þrjá, að hámarki. Skólayfirvöld sjá um að endurgreiða nemanda eða greiða sálfræðingi eftir því sem við á. „Stjórnendur Menntaskóla Borgarfjarðar eru afar þakklátir aðilum sjúkrasjóðs Stéttarfélags Vesturlands og vilja koma því á framfæri að þessi styrkur er ómetanlegur fyrir skólann,“ segir í tilkynningu á heimasíðu Menntaskóla Borgarfjarðar.

Líkar þetta

Fleiri fréttir