Viðey RE. Ljósm.HB Grandi/ Kristján Maack.

Nýju ísfisktogararnir jafnvel betri en vonast hafði verið til

Viðey RE kom til hafnar í Reykjavík fyrr í vikunni eftir vel heppnaða veiðiferð á Vestfjarðamið. Senn líður að því að skipið, sem er einn þriggja nýrra ísfisktogara HB Granda, sé búið að vera í rekstri í þrjá mánuði og segist skipstjórinn ekki vera í vafa um að skipin séu búin að sanna ágæti sitt og gott betur en það. Á vef HB Granda er rætt við Jóhannes Ellert Eiríksson skipstjóra. „Það eru allir í skýjunum með þessi nýju skip,“ segir hann. „Ef eitthvað er þá hafa skipin farið fram úr okkar björtustu vonum. Þau eru ótrúlega öflug og færu létt með að draga tvö troll samtímis. Þau eru sömuleiðis miklu rólegri í sjó en gömlu skipin, stampa ekki og maður finnur ekki fyrir því þegar verið er að snúa þótt veðrið sé ekki gott.“

Um nýliðna veiðiferð á Vestfjarðamið segir Jóhannes Ellert að veður hafi fælt menn frá því að hefja veiðiferðina á heimamiðum. ,,Við fórum því á Vestfjarðamið og vorum að veiðum í kantinum út af Patreksfirði norður á Hala. Aflinn var góður og við vorum alls með 180 tonna afla í túrnum,“ segir Jóhannes Ellert, en hann upplýsir að heldur sé að draga úr gullkarfaveiði á Vestfjarðamiðum en góður gullkarfaafli hafi hins vegar fengist upp á síðkastið á Fjöllunum og öðrum heimamiðum ísfisktogara HB Granda úti fyrir suðvesturlandi.

Líkar þetta

Fleiri fréttir