Samið um endurbætur og stækkun grunnskólans
Síðastliðinn föstudag var undirritaður samningur milli Borgarbyggðar og byggingarfyrirtækisins Eiríkur J. Ingólfsson ehf. um stækkun og heildarendurbætur á húsnæði Grunnskólans í Borgarnesi. Er samningurinn gerður að undangengnu útboði sem Ríkiskaup sá um fyrir sveitarfélagið. Einungis barst eitt tilboð í verkið. Á vef sveitarfélagsins segir að framkvæmdir muni nú hefjast á næstu dögum. Verkið mun standa yfir í þrjú ár og er heildarkostnaður við það um 750 milljónir króna. „Langþráður áfangi er nú í höfn varðandi endurnýjun og stækkun húsnæðis skólans og stórbætta aðstöðu nemenda og starfsfóks,“ segir í tilkynningu vegna undirritunar samningsins.
