Glæpasagan Köld slóð gefin út af Mth

Mth útgáfa á Akranesi sendir frá sér þýdda glæpasögu fyrir þessa páska. Það er Köld slóð eftir sænska höfundinn Emelie Schepp sem var útnefnd glæpasagnahöfundur ársins 2017 í Svíþjóð. Er það annað árið í röð sem henni hlotnast sá heiður.

Um efni bókarinnar segir á kápu: „Á köldu desemberkvöldi staðnæmist hraðlestin frá Kaupmannahöfn til Stokkhólms á aðallestarstöðinni í Norrköping. Ung kona finnst látin um borð og reynist hún vera með eiturlyf innvortis. Ferðafélagi hennar, önnur ung stúlka, er horfin sporlaust út í myrkrið. Jana Berzelius saksóknari fær málið til rannsóknar og fyrr en varir flækist hún í atburðarás þar sem skuggaleg leyndarmál fortíðar hennar minna á sig. Henrik Levin og Mia Bolander hjá rannsóknarlögreglunni í Norrköping komast á slóð manns sem er grunaður um morð – og þá hefst kapphlaup upp á líf og dauða því Jana verður að finna morðingjann á undan lögreglunni.“ Köld slóð er önnur bókin í bókaseríunni um saksóknarann Jönu Berzelius sem kemur út á íslensku en væntanlegar eru 6 bækur til viðbótar. Kristján H. Kristjánsson þýddi.

Líkar þetta

Fleiri fréttir