Frá undirritun samningsins. F.v. Hulda Birna Baldursdóttir, framkvæmdastjóri KFÍA, Viktor Helgi Benediktsson, Jóhannes Karl Guðjónsson, þjálfari mfl. karla og Magnús Guðmundsson, formaður KFÍA. Ljósm. KFÍA.

ÍA semur við Viktor Helga

Viktor Helgi Benediktsson hefur samið við Knattspyrnufélag ÍA til þriggja ára og mun því leika með liði Skagamanna út sumarið 2020. Viktor er fæddur árið 1998, uppalinn hjá FH en spilaði með HK í 1. deildinni síðasta sumar, undir stjórn Jóhannesar Karls Guðjónssonar, núverandi þjálfara ÍA. Lék hann 19 leiki með Kópavogsliðinu í fyrra og skoraði í þeim þrjú mörk.

„Það er mikill heiður að fá að spila fyrir klúbb með jafn mikla sögu og ÍA. Þetta var í raun aldrei nein spurning eftir að Jói Kalli hringdi í mig og sagðist vilja sjá mig í gulu. Ég átti frábært ár hjá HK 2017 undir hans stjórn og ég veit að það verður frábært að fá að vinna með honum aftur. Það skemmir svo alls ekki fyrir að hafa Sigga Jóns við hlið hans. Það eru rosalega spennandi tímar framundan hér á Skaganum og ég get ekki beðið eftir því að byrja,“ segir Viktor Helgi.

Þjálfarinn lýsir sömuleiðis yfir ánægju sinni með að fá leikmanninn til liðs við ÍA. „Ég er virkilega ánægður með að hafa fengið Viktor Helga til liðs við okkur á Skaganum. Viktor passar vel inn í framtíðarmarkmið okkar sem eru að búa til öfluga liðsheild og koma Skaganum aftur í efstu deild,“ segir Jóhannes Karl þjálfari.

Líkar þetta

Fleiri fréttir