Framkvæmdaár fer í hönd hjá Leynisfélögum á Akranesi

Aðalfundur Golfklúbbsins Leynis var haldinn þriðjudaginn 12. desember síðastliðinn. Á fundinum fór Guðmundur Sigvaldason framkvæmdastjóri yfir skýrslu um starf klúbbsins og þær stórframkvæmdir sem framundan eru á svæðinu, gjaldkeri fór yfir reikninga og framkvæmdastjóri kynnti fjárhags- og rekstraráætlun næsta árs. Fram kom hjá Guðmundi að rekstur Leynis var erfiður rekstrarárið 2017 og lækkuðu rekstrartekjur um 10% milli ára. Skýrist það einkum af minni tekjum af velli sem og lægri framlögum og styrkjum. Rekstrargjöld voru hins vegar í takti við fyrri ár og áætlanir. Rekstrarafkoma varð því neikvæð um 4,3 mkr. og heildartap ársins að teknu tilliti til fyrninga og fjármunagjalda var rúmar tíu milljónir króna.

Í skýrslu stjórnar kom fram hvað myndarlegt og öflugt félagsstarf er hjá Leyni. Félagsmenn í Leyni eru nú um 490 og fjölgaði milli ára um 12%. Þar vóg mest hvað kvenna-, barna- og unglingastarfið tók mikinn kipp og fjölgaði hlutfallslega mest í þeim hópum. Spiluðum hringjum fækkaði mikið milli ára, voru 16.235 hringir samanborið við 18.400 hringi árið 2016. Fjölbreytt mótahald var að vanda á vegum Leynis í sumar með blöndu af 57 innanfélagsmótum, opnum mótum og GSÍ mótum. Mótasókn drógst saman milli ára en 2.235 kylfingar sóttu Garðavöll heim samanborið við tæplega 2.500 árið 2016. Fram kom að stjórn Leynis hefur skoðað og ígrundað vel stöðu rekstrar og nú þarf að blása í öll segl og snúa við taprekstri. „Í áætlunum fyrir rekstrartekjur er gert ráð fyrir að félagsgjöld hækki, æfingagjöld verði sett á fyrir börn og unglinga sem og aukin sókn í aðrar tekjur svo sem framlög og styrki og aðrar þær tekjur sem hægt er að búa til á velli. Að sama skapi gera áætlanir rekstrargjalda ráð fyrir almennu aðhaldi og niðurskurði á völdum stöðum í rekstrinum. Hækkun á félagsgjöldum var lögð fyrir fundinn og hlaut samþykki. Gjaldskrá verður birt innan skamms á heimasíðu Leynis þegar innheimta árgjalda hefst,“ sagði Guðmundur Sigvaldason.

Stjórn Leynis var endurkjörin en hana skipa Þórður Emil Ólafsson formaður, Eiríkur Jónsson, Hörður Kári Jóhannesson, Berglind Helgadóttir og Ingibjörg Stefánsdóttir.  Heimir Bergmann var kosinn varamaður í stjórn. Úr stjórn gekk Hannes Marinó Ellertsson og var honum þakkað fyrir góð stjórnarstörf undanfarin 6 ár.

 

Guðmundar- og Óðinsbikarinn var veittur Valdísi Þóru Jónsdóttur fyrir góðan árangur á árinu en hún átti afbragðsgott tímabil sem atvinnukylfingur. Pálína Alfreðsdóttir móðir Valdísar Þóru tók við bikarnum úr hendi Þórðar Emils Ólafssonar formanns Leynis.

Viðurkenningar veittar

Viðurkenningar voru að venju veittar. Guðmundar- og Óðinsbikarinn, var veittur Valdísi Þóru Jónsdóttur fyrir góðan árangur á árinu en hún átti afbragðsgott tímabil sem atvinnukylfingur.  Björn Viktor Viktorsson fékk háttvísisverðlaun GSÍ en þau eru veitt ár hvert þeim kylfingi undir 18 ára aldri sem endurspeglar hvað mest þá eiginleika sem Leynir vill sjá í afreksefnaunglingum sínum. Garðar Axelsson fékk viðurkenningu fyrir mestu forgjafarlækkun hjá Leyni en Garðar lækkaði úr 54,0 í 37,0 á árinu 2017 en Garðar gekk í Leyni á vormánuðum sem nýliði. Guðmundur Sigurjónsson og Jóhannes Karl Engilbertsson fengu viðurkenningu fyrir flesta spilaða hringi á árinu en þeir töldu um 78 frá opnun vallar til lokunnar nú í haust.

 

Framkvæmdir hefjast við byggingu nýrrar frístundamiðstöðvar við Garðavöll í byrjun næsta árs.

Frístundahús boðið út

„Bjartir og spennandi tímar eru framundan í húsnæðismálum með nýrri frístundamiðstöð þar sem samningar um verkefnið eru í höfn og styttist í að framkvæmdir hefjist,“ sagði Guðmundur. Fór hann yfir stöðu mála varðandi húsnæðismál Leynis. Gert er ráð fyrir áfangaskiptu verki við byggingu frístundahúss. Fyrsti áfangi verður tekinn í notkun undir lok sumars 2018. „Áfangi 1 tekur til uppsteypu og frágangs á byggingunni að utan sem og 200m2 afgreiðslu og skrifstofuhluta. Áfangi 2 tekur til fullnaðarfrágangs á 500m2 sal, eldhúsi og öðrum stoðrýmum. Áætlaður framkvæmdakostnaður er 303 mkr. án virðisaukaskatts og mun Fasteignafélag Akraness verða eigandi hússins að fullu. Leynir hefur með samningum við Akraneskaupstað tekið að sér að vera umsjónar- og rekstraraðili byggingarinnar frá upphafi verks og einnig þegar hún verður tekin til notkunar.

Fram kom að vinnu við teikningar er að mestu lokið en aðalhönnuður er Halldór Stefánsson og hefur síðan önnur verkfræðivinna verið í umsjón Mannvits og Alhönnunar. Tilboð eru kominn í alla stærstu og veigamestu verkþætti og gert ráð fyrir að samningar við verktaka klárist í þessum mánuði. Áætlanir gera ráð fyrir að framkvæmdir hefist í byrjun janúar 2018 en nú er unnið við uppsetningu á vinnusvæði, bráðabirgðatengingum og niðurrif bygginga. Framkvæmdastjóri fór að lokum yfir teikningar af byggingunni og útskýrði fyrir fundargestum og svaraði spurningum.

Líkar þetta

Fleiri fréttir