medium

large

thumbnail

1536x1536

2048x2048

small

custom-size

Finnst alveg rosalega gaman að ferðast

Fermingardagurinn minn

Sterkur sigur Skallagríms á Þór

Eftirminnilegar fermingar

Uppbygging á aðstöðu til jarðræktarrannsókna að hefjast á Hvanneyri

Hlutverk feðranna í fermingarundirbúningnum

core/freeform

Gunnlaugur A Júlíusson sveitarstjóri Borgarbyggðar hefur sent Samgönguráðuneytinu bréf þar sem hann ítrekar þá kröfu sveitarfélagsins að bætt verði úr vetrarþjónustu snjómoksturs í uppsveitum Borgarfjarðar. Vegagerðin fékk jafnframt afrit af bréfinu. Í dag er viðsjárverð færð á þessu svæði og samkvæmt upplýsingum Skessuhorns hafa hið minnsta fjórir bílar farið útaf á Borgarfjarðarbraut í dag vegna hálku og hættulegra akstursskilyrða. Í bréfi Gunnlaugs sem skrifað var í síðustu viku segir m.a.: „Á síðastliðnum vetri sendi Borgarbyggð ítrekað kröfur til Vegagerðarinnar og samgönguráðuneytisins um úrbætur í snjómokstri með fjölgun mokstursdaga í uppsveitum Borgarfjarðar. Sérstök áhersla var lögð á mokstur Borgarfjarðarbrautar sem leið liggur frá Borgarfjarðarbrú upp að Húsafelli. Á síðustu árum hefur þróast í uppsveitum Borgarfjarðar umfangsmikil ferðaþjónusta auk þess sem almenn búseta hefur styrkst í samræmi við styrkingu ferðaþjónustunnar,“ segir í bréfinu. Vísar Gunnlaugur þar í aukna starfsemi svo sem vegna Hótels Húsafells, ísganga í Langjökli, starfsemi í Víðgelmi, Fosshótels Reykholti sem nú er að stækka og nú nýverið bættist við baðstaðurinn Krauma í Deildartungu við þau fyrirtæki sem gera munu út á ferðaþjónustu allt árið.

„Því er stöðug umferð ferðafólks allt árið um þessar slóðir orðin regla en ekki undantekning eins og fyrir fáum árum. Það gefur því að skilja að tryggar og öruggar samgöngur eru ekki einungis mikilvægar fyrir samfélagið á þessum slóðum og rekstur þeirra fyrirtækja sem þar eru staðsett, heldur eru þær einnig mikið öryggisatriði fyrir ferðafólk sem á leið um þessar slóðir og er yfirleitt óvant að aka við erfiðar og ófyrirsjáanlegar vetraraðstæður. Síðastliðinn vetur var mjög snjóléttur og því vildi svo vel til að fáir snjómokstursdagar urðu ekki til mikilla vandræða,“ skrifar Gunnlaugur.

Á þeim tiltölulega fáum dögum sem liðnir eru síðan fór að snjóa og frysta nú í vetrarbyrjun hefur fjöldi fólks haft samband við sveitarfélagið Borgarbyggð og lýst hrakförum sínum og hættulegum akstursskilyrðum vegna lélegrar vetrarþjónustu á umræddri leið. „Þegar saman fara frosin krapaför á veginum og snjóhula þar ofan á er vegurinn beinlínis hættulegur fyrir þá umferð sem um hann fer. Því er hér enn og aftur skorað á Samgönguráðuneytið og Vegagerðina að fjölga snjómokstursdögum á Borgarfjarðarbraut frá Borgarfjarðarbrú upp að Húsafelli áður en slys hlýst af því ófremdarástandi sem nú ríkir í vetrarþjónustu á þessari leið.“

Fjölga verður snjómokstursdögum í uppsveitum Borgarfjarðar