medium

large

thumbnail

1536x1536

2048x2048

small

custom-size

Nota fæðingarorlofið til að yfirfara veiðarfærin

Katrín með forskot á aðra frambjóðendur samkvæmt nýjustu könnun

Ráðstefnan Nýsköpun í skólastarfi haldin í Menntaskóla Borgarfjarðar

Enskumælandi ráð Mýrdalshrepps hlaut Landstólpann

Fjölmenning í Grundaskóla – myndasyrpa

Knittable verður framlag Íslands í Creative Business Cup

core/freeform

Íbúum Akraness mun fjölga umtalsvert í fáeina daga í næstu viku því dagana 25.-29. júlí munu fjögurhundruð skátar dvelja í bænum. Ástæðan er að eitt stærsta skátamót heims verður haldið á Íslandi. Mótið heitir World Scout Moot og er haldið í fimmtánda sinn í ár en mótið er haldið á fjögurra ára fresti fyrir skáta á aldrinum 18-25 ára. Alls munu 5.500 skátar og sjálfboðaliðar koma til landsins frá öllum heimshornum. „Á Akranes munu koma skátar víðs vegar að úr heiminum; Brasilíu, Kanada, Belgíu, Pakistan svo eitthvað sé nefnt. Hér munu ólíkir menningarheimar mætast og við þurfum að koma til móts við alla, hvort sem það tengist klósettaðstöðu, svefnrými eða öðru. Þessi samsuða af allri menningarflóru heimsins er það sem gerir alþjóðleg skátamót svo einstæð. Það er magnað að sjá að þrátt fyrir mikinn mun á menningu og trúarbrögðum, jafnvel þó svo að stríð sé á milli landa, truflar það starf skátanna aldrei. Skátar sameinast sem skátar og koma saman á jafningja grundvelli til að kynnast og hafa gaman,“ segir Elínborg Guðmundsdóttir hjá Skátafélagi Akraness í samtali við Skessuhorn. Hún ásamt Bergnýju Dögg Sophusdóttur sér um komu skátana til Akraness.

Skátarnir munu dvelja á efra svæði tjaldsvæðisins á Kalmansvöllum þar sem komið verður upp tjaldbúðum. „Akraneskaupstaður hjálpar okkur með mótið og þarf Bandalag íslenskra skáta ekki að greiða fyrir afnot af tjaldsvæðinu en í stað þess leggja allir skátar mótsins til vinnu fyrir Akraneskaupstað. Skátarnir þurfa að skila vinnuframlagi fyrir Akraneskaupstað sem samsvarar hálfum vinnudegi. Þá munu skátarnir slá, mála og sitthvað fleira til að fegra bæinn,“ segir Bergný Dögg.

Mótið hefur verið lengi í undirbúningi hérlendis og hafa aðstandendur unnið hörðum höndum að undanförnu til að mótið verði að veruleika. „Ferlið hjá bandalaginu hófst fyrir um sjö árum en fyrir þremur árum fór undirbúningurinn af stað af fullum þunga og um leið hófst ferlið hjá okkur. Upphaflega stóð til að skátarnir væru með tjaldbúðir í Skorradal en fljótlega komumst við að því að Akranes hentaði betur. Bæði vegna þess að þá gætum við tekið við fleirum, auðveldara væri að uppfylla allar öryggiskröfur, sem eru mjög strangar, útaf sjúkrahúsinu og svo er skemmtilegra að vera sýnileg. Skátastarf á Akranesi hefur verið í lægð undanfarin tvö ár og að fá þennan stóra hóp á Akranes getur aukið áhuga barna á skátastarfinu. Við verðum mjög sýnileg þar sem allskyns dagskrá verður fyrir skátana sem dvelja á Akranesi. Við munum bjóða upp á dagsferð um Borgarfjörð, ætlum að nýta Langasand vel með kajakferðum og sjósundi. Það verður söguganga um bæinn og svo munum við nýta Akrafjall í dagsferð svo eitthvað sé nefnt,“ segir Bergný Dögg.

Þær Elínborg og Bergný Dögg telja að skátarnir muni setja lit sinn á bæinn í næstu viku á jákvæðan hátt. „Allir sem hingað eru að koma ætla sér að hafa gaman og búast má við að það verði líf og fjör á Akranesi. Þetta hefur verið krefjandi en skemmtilegt verkefni og það eru líkur á því að við verðum mjög þreyttar þegar mótinu lýkur en einnig sælar og glaðar. Okkur hlakkar mikið til að fá gestina og kynna þeim bæinn okkar,“ segir Elínborg að endingu.

Fjögurhundruð skátar á leið til Akraness