medium

large

thumbnail

1536x1536

2048x2048

small

custom-size

Hafnarstjórinn sem hefði getað orðið prestur

„Að vera á sjó var eins og hver önnur vinna“

Mikilvæg lífæð fyrir fólkið hér á svæðinu

Íbúafundur Miðbæjarsamtakanna í Tónbergi á mánudaginn

Viðunandi útkoma Dalabyggðar á síðasta ári

Óbyggðanefnd framlengir frest vegna eyja og skerja

core/freeform

Skallagrímur mætti Stjörnunni í Domino‘s deild kvenna í körfuknattleik á miðvikudagskvöld. Leikið var í Garðabæ. Fyrir leikinn í gær hafði Skallagrímsliðið tapað síðustu þremur leikjum en ljóst er að tapleikirnir verða ekki fleiri í röð. Skallagrímur sigraði í spennandi en kaflaskiptum leik, 79-84.

Upphafsfjórðungurinn gaf tóninn fyrir það sem á eftir kom. Stjarnan byrjaði betur og komst í 7-2 en eftir það náði Skallagrímur góðum leikkafla og sneri taflinu sér í vil, 18-12 seint í leikhlutanum. Stjörnukonur áttu lokaorðið og liðin voru jöfn að stigum eftir upphafsfjórðunginn, 20-20. Annar leikhluti var eins og spegilmynd af þeim fyrsta. Skallagrímskonur voru sterkari framan af og komust sjö stigum yfir áður en Stjarnan tók við sér og náði sex stiga forskoti. Borgnesingar áttu lokaorðið í fyrri hálfleik og jöfnuðu í 43-43 þegar flautað var til hálfleiks.

Skallagrímskonur komu ákveðnar til leiks eftir hléið og náðu fimm stiga forskoti fyrir miðjan þriðja leikhluta. Þá náði Stjarnan góðum kafla og upp úr því sjö stiga forskoti. Skallagrímur átti síðan lokaorðið í fjórðungnum og minnkuðu forskot Stjörnunnar í eitt stig fyrir lokaleikhlutann, 63-62. Skallagrímskonur voru komnar í villuvandræði fyrir lokafjórðunginn og í upphafi hans fengu bæði Sigrún Sjöfn Ámundadóttir og Tavelyn Tillman sína fjórðu villu. Þær sýndu reynslu sína og náðu að ljúka leiknum. Stjarnan leiddi lungann úr fjórða leikhluta og höfðu sjö stiga forskot þegar fjórar mínútur voru eftir. Þá tók Skallagrímsliðið við sér að nýju og áðurnefndar Sigrún og Tavelyn skiptust á að skora og drógu vagninn fyrir Borgnesinga. Fór að lokum svo að Skallagrímur hafði mikinn vinnusigur á lokametrunum, 79-84.

Sigrún var að öðrum ólöstuðum maður leiksins. Hún skoraði 20 stig, tók 16 fráköst og gaf fimm stoðsendingar. Tavelyn var stigahæst með 32 stig og tók fimm fráköst að auki. Fanney Lind Thomas skoraði 19 stig en aðrar höfðu minna.

Skallagrímur situr í 2. sæti deildarinnar með 34 stig, jafn mörg og Keflavík í sætinu fyrir neðan en tveimur stigum á eftir toppliði Snæfells.

Næsti leikur Skallagríms fer fram á miðvikudaginn þegar liðið mætir botnliði Grindavíkur í Borgarnesi.

Skallagrímur sigraði í kaflaskiptum leik