medium

large

thumbnail

1536x1536

2048x2048

small

custom-size

Hafnarstjórinn sem hefði getað orðið prestur

„Að vera á sjó var eins og hver önnur vinna“

Mikilvæg lífæð fyrir fólkið hér á svæðinu

Íbúafundur Miðbæjarsamtakanna í Tónbergi á mánudaginn

Viðunandi útkoma Dalabyggðar á síðasta ári

Óbyggðanefnd framlengir frest vegna eyja og skerja

core/freeform

Sem kunnugt er stendur nú yfir verkfall sjómanna fiskiskipaflotans og hefur staðið yfir síðan 14. desember. Miðað við fregnir síðustu daga virðist viðræðum sjómanna við SFS, Samtök fyrirtækja í sjávarútvegi, miða lítið áfram og enn vera langt á milli deiluaðila.

Á meðan verkfallið varir eru smábátasjómenn þeir einu sem róa til fiskjar. Sást það glögglega í yfirliti yfir aflahæstu báta sem reru frá höfnum á Vesturlandi í síðustu viku, sem allir voru smábátar. Smábátasjómenn eru hins vegar mjög háðir veðri og vindum. Föstudaginn 30. desember komust smábátasjómenn á Snæfellsnesi til að mynda í fyrsta sinn á sjó frá því fyrir jól vegna ótíðar og vonskuveðurs. Fengu þeir góðan afla, tekið var á móti 21,3 tonnum í Fiskmarkaði Snæfellsbæjar þennan dag og fékkst gott verð fyrir aflann, einmitt vegna sjómannaverkfallsins. En þrátt fyrir að smábátasjómenn njóti tímabundið góðs af hærra verði vegna snarminnkaðs framboðs á fiski kemur sjómannaverkfallið vitaskuld afar illa við samfélög eins og Snæfellsbæ og Grundarfjörð, þar sem atvinnulífið byggist að langstærstu leyti á fiskveiðum og fiskvinnslu. Margfalt minna er veitt af fiski fyrir vikið því stóru bátarnir róa ekki og fiskvinnslur eru margar lokaðar. „Eins og gefur að skilja eru áhrif sjómannaverkfallsins heilmikil. Ætli það séu ekki milli 400 og 500 manns hér í Snæfellsbæ sem vinna við störf tengd veiðum og fiskvinnslu,“ segir Kristinn Jónasson, bæjarstjóri í Snæfellsbæ, í samtali við Skessuhorn á fimmtudag. „Það eru bara smábátasjómenn og beitningafólk sem vinna í dag. Ég held að allar vinnslur séu lokaðar nema ein. Fólkið í vinnslunum sem eru lokaðar fær vissulega atvinnuleysisbætur á meðan, en þær eru bara brot af þeim launum sem fólkið hefur í vinnunni. Það er því afskaplega slæmt fyrir samfélagið að það skuli vera verkfall, sérstaklega núna þegar vetrarvertíðin er að byrja,“ segir hann og vonast til að verkfallinu ljúki hið fyrsta. „Ég vona að deiluaðilar nái saman sem fyrst því þetta hefur gríðarlega mikil áhrif á okkar samfélag,“ segir Kristinn Jónasson.

Sömu sögu er að segja úr Grundarfirði, en í nýárspistli sem birtist í síðasta Skessuhorni hafði Þorsteinn Steinsson bæjarstjóri á orði að farsælast væri fyrir alla að verkfallinu lyki sem fyrst. „Verkfall sjómanna er í gangi sem auðvitað er erfitt í sveitarfélagi eins og Grundarfirði sem byggir langstærstan hluta atvinnulífs íbúa á fiskveiðum og fiskvinnslu. Vonandi tekst að leysa þessa deilu hið snarasta, það er best fyrir alla,“ sagði Þorsteinn Steinsson.

Sjómannaverkfallið kemur illa við sjávarplássin