medium

large

thumbnail

1536x1536

2048x2048

small

custom-size

Ólsarar áfram í Mjólkurbikarnum

Stuð í Brekkó í morgunsárið

Skipulagsbreytingar hjá Arion banka

Stóri plokkdagurinn verður sunnudaginn 28. apríl

Skíðasvæði Snæfellsness blæs í herlúðra

Lokakeppni Vesturlandsdeildar 2024

core/freeform

Skallagrímsmenn mættu Njarðvíkingum í Domino‘s deild karla í körfuknattleik í gær. Leikið var suður með sjó. Njarðvíkingar höfðu yfirhöndina heilt yfir og þrátt fyrir að Skallagrímur hafi oft gert atlögu að forskoti heimamanna máttu Borgnesingar á endanum sætta sig við tap, 94-80, eftir lokamínútur þar sem þriggja stiga skyttur Njarðvíkinga fóru mikinn.

Njarðvíkingar gáfu tóninn strax á fyrstu mínútu leiksins. Þeir komust yfir og skipuðu Skallagrímsmönnum það hlutverk að elta. Njarðvík leiddi allan fyrsta fjórðunginn og þó Borgnesingar hafi aldrei verið langt undan framan af þá stjórnuðu heimamenn ferðinni og höfðu átta stiga forskot undir lok upphafsfjórðungsins. Skallagrímsmenn svöruðu fyrir sig í öðrum leikhluta, minnkuðu forskot heimamanna snarlega og komust stigi yfir. Eftir það var mjög jafnt á með liðunum, þau köstuðu forystunni á milli sín en undir lok fyrri hálfleiks komust heimamenn yfir á nýjan leik og leiddu með fjórum stigum í hléinu, 49-45.

Njarðvíkingar komu mjög ákveðnir til síðari hálfleiks, héldu Skallagrímsmönnum stigalausum fyrstu fjórar mínúturnar og 13 stiga forystu. Eftir það tóku Borgnesingar við sér og náðu að minnka muninn í fjögur stig. Njarðvíkingar áttu hins vegar lokaorðið í fjórðungnum og leiddu með átta stigum fyrir fjórða leikhluta. Leikmenn Skallagríms gáfu ekkert eftir í lokafjórðungnum og höfðu minnkað muninn niður í aðeins þrjú stig þegar fimm mínútur lifðu leiks. Á lokamínútum leiksins tóku skyttur heimamanna hins vegar við sér, hreinlega skutu Skallagrím í kaf og tryggðu Njarðvíkingum sigur frá þriggja stiga línunni. Lokatölur 94-80, Njarðvík í vil.

Flenard Whitfield var stigahæstur Skallagrímsmanna með 27 stig og tók þar að auki tólf fráköst. Sigtryggur Arnar Björnsson skoraði 24 stig, tók sjö fráköst og gaf sex stoðsendingar.

Skallagrímur er í tíunda sæti deildarinnar með tvö stig eftir fimm leiki, jafn mörg og Haukar í sætinu fyrir ofan og Þór Ak. í sætinu fyrir neðan.

Framundan er bikarhelgi og þar etja Skallagrímsmenn kappi við Breiðablik. Liðin mætast í Smáranum í Kópavogi á mánudaginn, 7. nóvember. Næsti deildarleikur Skallagríms fer síðan fram á fimmtudaginn, 10. nóvember, þegar liðið tekur á móti Keflavík.

Skallagrímsmenn skotnir í kaf á lokamínútunum