Eliza Reid forsetafrú afhenti í gær fimm konum sem greinst hafa með brjóstakrabbamein fyrstu bleiku slaufurnar. Þær eru í miðjunni og Eliza Reid ásamt Sigrúnu Gunnarsdóttir til vinstri og til hægri eru Lovísa og Unnur Eir hönnuðir Bleiku slaufunnar 2016.

Bleika slaufan til stuðnings endurnýjun leitartækja

Líkt og undanfarinn  áratug tileinkar Krabbameinsfélagið októbermánuð baráttunni gegn krabbameini í konum undir merkjum Bleiku slaufunnar. Í ár er sjónum beint að algengasta krabbameini íslenskra kvenna – brjóstakrabbameini. Hér á landi greinist kona með brjóstakrabbamein á um 40 klukkustunda fresti árið um kring. „Margt hefur áunnist í baráttunni gegn brjóstakrabbameini á undanförnum árum. Lífslíkur hafa til að mynda aukist til muna. Þannig geta 90% kvenna sem greinast með brjóstakrabbamein nú vænst þess að lifa lengur en fimm ár. Um 3.000 konur eru á lífi í dag sem greinst hafa með brjóstakrabbamein. Það er hins vegar lífsnauðsynlegt að gera enn betur: Enn látast um 40 konur úr sjúkdómnum á hverju ári,“ segir í tilkynningu frá félaginu.

Öflugasta vopnið í baráttunni gegn brjóstakrabbameini er skipuleg leit til að finna krabbamein á byrjunarstigi þegar lækning er möguleg. Brýn þörf er á að endurnýja tækjabúnað til skipulegrar leitar og er söfnunarfé Bleiku slaufunnar varið til endurnýjunar tækja. Bleika slaufan er að þessu sinni hönnuð af Lovísu og Unni Eir gullsmiðum. Form slaufunnar táknar stuðningsnetið sem mikilvægast er þeim konum sem greinast með krabbamein – fjölskylduna og samfélagið. Slaufan kostar 2.000 krónur. Bleika slaufan er seld á fjölda sölustaða án nokkurrar álagningar. Söluandvirðið rennur því óskipt til söfnunar Krabbameinsfélags Íslands. Sölustaði Bleiku slaufunnar má finna á www.bleikaslaufan.is

Líkar þetta

Fleiri fréttir