medium

large

thumbnail

1536x1536

2048x2048

small

custom-size

Fór í Stýrimannaskólann og varð faðir sautján ára gamall

Var mikill sveitamaður í sér þótt sjómennskan hafi orðið ofan á

Aukin hætta á fuglainflúensu með komu farfuglanna

Glæsilegir tónleikar í Borgarneskirkju

Akranesmótið í pílu um helgina

Vígreif í hefðbundnu karlastarfi

core/freeform

Leikið var í 19. umferð Pepsi deildar karla í knattspyrnu í dag. Á Akranesvelli tóku heimamenn í ÍA á móti erkifjendunum úr KR. Urðu Skagamenn að þessu sinni að sætta sig við tap með einu marki gegn engu í fremur tíðindalitlum leik.

Völlurinn var rennandi blautur eftir rigningardag og setti það svip sinn á leikinn. Leikmenn beggja liða áttu á köflum erfitt með að fóta sig.

Leikurinn fór heldur rólega af stað. Jafnræði var með liðunum, KR-ingar voru meira með boltann en Skagamenn lágu aftar á vellinum. Helstu marktilraunir voru langskot sem ollu markvörðum liðanna ekki teljandi vandræðum.

Á 30. mínútu vildu Skagamenn fá vítaspyrnu. Garðar Gunnlaugsson vann boltann af vörn gestanna var sloppinn einn í gegn þegar varnarmaður KR kom aðvífandi og tæklaði Garðar með þeim afleiðingum að hann féll í teignum. Skagamenn vildu víti en dómari leiksins var á því að varnarmaðurinn hefði fyrst náð til knattarins. Skömmu síðar björguðu Skagamenn á marklínu eftir skalla og áhorfendur vongóðir um að líf væri að færast í leikinn. Sú varð hins vegar ekki raunin, hvorugu liði tókst að skapa sér teljandi marktækifæri það sem eftir lifði fyrri hálfleiks.

Síðari hálfleikur byrjaði eins og sá fyrri endaði. Hvorugt lið náði að skapa sér ákjósanleg færi, völlurinn varð æ blautari og menn áttu erfitt með að fóta sig. Það var ekki fyrr en eftir klukkustundar leik að fyrsta mark leiksins leit dagsins ljós. Morten Beck skoraði með viðstöðulausu skoti vinstra megin í teignum eftir góða sendingu frá Gunnari Þór Gunnarssyni. Litlu munaði að Morten bætti öðru marki við aðeins nokkrum mínútum síðar. Hann komst einn inn fyrir vörn Skagamanna en skot hans rétt framhjá.

Aftur datt botninn úr leiknum, KR-ingar héldu boltanum og stjórnuðu leiknum en Skagamönnum gekk illa að láta að sér kveða. Það var ekki fyrr en á 86. mínútu að þeir voru nálægt því að jafna. Eftir sendingu fram völlinn féll boltinn fyrir fætur Garðars sem lét vaða af rúmlega 30 metra færi. Skot hans var fast og stefndi í hornið niðri en Stefán Logi í marki KR bjargaði í horn. Aftur fengu Skagamenn tækifæri til að jafna í uppbótartíma þegar þeir fengu aukaspyrnu rétt utan vítateigs. Garðar tók spyrnuna en skot hans fór rétt yfir markið og þar við sat. Lokatölur á Akranesvelli 0-1, KR í vil.

Skagamenn urðu fyrir áfalli í blálok uppbótartímans þegar fyrirliðinn Ármann Smári Björnsson haltraði af velli, að því er virtist sárþjáður. Talið er að Ármann hafi slitið hásin og má slá því föstu að hann verði lengi fjarri góðu gamni.

En úrslit leiksins þýða að Skagamenn eru í sjötta sæti deildarinnar með 28 stig, einu stigi á eftir KR sem lyfti sér upp í 5. sætið með sigrinum. Næsti leikur ÍA er á mánudaginn, 19. september, þegar liðið heimsækir Stjörnuna í Garðabæinn.

Skagamenn máttu sætta sig við tap gegn erkifjendunum