 Það sem af er þessu ári hefur 8.267 tonnum af kolmunna verið landað til bræðslu hjá fiskimjölsverksmiðju HB Granda á Akranesi. Þá hefur 5.053 tonnum af gulldeplu verið landað á sama tíma. Fiskimjölsverksmiðjan hefur sent frá sér 475 tonn af kolmunnamjöli á árinu og 646 tonn af gulldeplumjöli. Björn Almar Sigurjónsson, rekstrarstjóri fiskimjölsverksmiðja HB Granda segir enga örðugleika við að losna við mjölið. Á morgun, miðvikudag, er von á öllum þremur uppsjávarveiðiskipum HB Granda til löndunar. Skipin Lundey NS, Ingunn AK og Faxi RE eru þó ekki með fullfermi, enda hefur verið ótíð á kolmunnamiðunum vestur af Írlandi að undanförnu.
Meðfylgjandi mynd var tekin sl. föstudag þegar verið var að lesta mjöli um borð í flutningaskipið Froan.
|
