 |
Karitas Ósk | Karitas Ósk Ólafsdóttir frá Akranesi og systkinin Magnús Ingi og Tinna Helgabörn úr Hvalfjarðarsveit hafa verið valin í landsliðið í badminton, sem fer á heimsmeistaramót landsliða, sem haldið verður í borginni Guangzhou í Kína, 10. til 17. maí nk. Auk þeirra eru í liðinu bræðurnir Helgi og Atli Jóhannessynir og Snjólaug Jóhannesdóttir en þau eru öll úr TBR, eins og reyndar Magnús Ingi og Tinna. Nú hefur verið tekin ákvörðun um að senda landsliðið á mótið en áður hafi verið hætt við það vegna bágrar fjárhagsstöðu Badmintonsambands Íslands. Samkomulag hefur náðst um að kostnaðinum verði skip á milli BSÍ, félags hvers keppanda og keppendanna sjálfra, þannig að hægt verði að senda liðið á mótið.
|
Liðið, sem landsliðsþjálfarinn og Skagamaðurinn, Árni Þór Hallgrímsson hefur valið, er það sama og stóð sig vel á Evrópumótinu í Liverpool í febrúar. Þá spilaði Karitas Ósk sína fyrstu landsleiki og stóð sig vel. Það hefur hún líka gert á mótum innanlands í vetur og leikið til úrslita í einliðaleik á flestum mótum vetrarins. Til dæmis sigraði hún í einliðaleik á Reykjavíkurmótinu fyrir stuttu.
|
