 “Í því ástandi sem nú ríkir í þjóðfélaginu er það mín skoðun að það verði að skoða allar atvinnugreinar sem hægt er til að auka tekjur þjóðarinnar. Við þurfum einfaldlega að vinna meira og afla meiri peninga. Það er ekki hægt að bjarga þjóðinni út úr þessum þrengingum með því einu að skera niður í velferðarkerfinu og draga saman í opinberum útgjöldum, það dugar einfaldlega ekki til,” segir Guðjón Arnar Kristjánsson formaður Frjálslynda flokksins og þingmaður í NV kjördæmi í samtali við Skessuhorn. Hann segir að nú þýði ekkert tilfinningavæl og vísar þar til óþarflega mikillar varfærni að hans mati í fiskveiðum. “Árið 1968 unnu Íslendingar sig út úr síldarkreppunni með því að sækja í allar þær fiskitegundar sem í boði voru. Þá voru veiðar að vísu heimilaðar og engin kvótatakmörkun í gangi. Þá unnu Íslendingar sig út úr kreppunni með höndunum og gjarnan var viðhaft máltækið; “Vinnan göfgar manninn og eftirvinnan ennþá meir.” Nú þarf að dusta rykið af slíkum sannindum,” segir Guðjón Arnar.
Sjá nánar í fréttaviðtali við Guðjón Arnar í Skessuhorni vikunnar.
| 
