Skessuhorn:

Bormenn með lífið í lúkunum

10. mars 2008

Starfsmenn við kjarnaborun og lagfæringar á Hvalfjarðargöngum verða enn og aftur vitni að vítaverðum akstri. Síðastliðinn föstudag var bifreið ekið á tilkynningarskilti þegar ökumaður reyndi að aka öfugu megin fram úr flutningabíl upp brekkuna að norðanverðu í göngunum. Starfsmenn segjast vera með lífið í lúkunum þar sem margir ökumanna virði merkingar að vettugi og aki óvarlega framhjá vinnusvæði.

„Þetta er hreinn og klár háskaakstur og bormennirnir eru satt að segja skelfingu lostnir yfir því sem þeir verða vitni að. Og það sem verra er - fyrir þá sjálfa og öryggi þeirra: Næsta hola verður boruð af akreininni sjálfri og þá verða bæði tæki og mannskapur á sjálfri akbrautinni og þar með í stórhættu ef ekki verður lát á glæfraakstrinum nú þegar,“ segir í tilkynningu á heimasíðu Spalar.